Meghalaya: MDA Shillong MP candidate Jemino

Meghalaya-a sorkarna siam mek, ṭangrual pawl Meghalaya Democratic Alliance (MDA) chuan BJP tello in UDP leader Dr Jemino Mawthoh chu Shillong Parliamentary seat atana common candidate turin lungrual takin thutlukna an siam.

UDP president Dr Donkupar Roy chuan hemi chungchang hi Thawhṭanni khan sawiin MDA-a an thawhpui party-te bakah independent MLA-te chuan Mawthoh chu common candidate-a dah tur hian thutlukna siamin, UDP symbol a hmang dawn tih a sawi.

Dr Donkupar Roy chuan Shillong-ah chuan UDP symbol hman a ni dawn tih sawiin, Tura-ah erawh NPP candidate a din dawn avangin NPP symbol hman a ni dawn tih a sawi bawk.

Donkupar Roy chuan Thawhṭanni aṭang khan inthlan tur atana ruahmanna an siam nghal thu sawiin Shillong leh Tura seat-ah hnehna chan ngei an tum tih a sawi a ni. He thu ziah lai hian Tura seat-a an common candidate tur erawh an la tichiang lo a, Aga­tha Sangma chu NPP symbol hmangin a ding dawn nia sawi thawm erawh a awm thung.

Hemi chungchanga media mite zawhna chhangin Chief Minister Conrad Sangma chuan thutlukna chu ni hranah NPP in an la siam dawn tih a sawi. MDA-ah hian BJP chu tel ve mah se LS inthlanah hian thawhpui nei lo turin thutlukna an siam a ni.

NPP state party president W Kharlukhi chuan Tura candidate tur chu NPP in party meeting an neih leh velah an tichiang dawn tih a sawi ve bawk. UDP president chuan hnehna an chang dawn tih 100% in an chiang tih a sawi a, MLA, MDC an ngah thu sawiin thlawptu pawh an ngah tawk tih a sawi a ni.

Meghalaya-ah hian LS inthlan hi thawhkhata neih a ni dawn a, April 11 hian an inthlang dawn a ni. January 17-a roll tihchhuah­ah khan Mipa 9,36,579 awmin hmeichhia 9,56,137 an awm a, roll a hming chuang zawng zawng hi 18,92,716 an ni.