Manipur HC in 'Congress MLA ' Okram Henry thlan tlin a nihna hnawl

Manipur High Court chuan kum 2017 Manipur assembly inthlana Congress MLA atana thlan tlin, a hnua BJP zawm ta Okran Henry thlan tlin a nihna chu Ningani khan hnawlin, he inthlana a khingpui BJP candidate Yumkham Erabot Singh chu MLA tharah a puang.

Kum 2017 assembly inthlana Wangkhei biala Henry nena inkhing, BJP candidate Yumkham Erabot Singh chuan Henry hian inthlan dawna Election Commission-a affidavit a thehluhah thu dik lo a tarlang nia sawiin petition a thehlut.

Petition-ah hian Henry hian a educational qualification dik lo a ziak a, hei bakah hian criminal case a neih pawh a zep niin Singh chuan a sawi bawk. Henry hian 2017-a 11th Manipur assembly inthlan neih tura a affidavit thehluhah hian highest education qualification-ah 'passed XII from Manipur Public School, CBSE' tiin a ziak a, mahse inthlan hmasa, 10th Manipur assembly inthlan neih dawna a nomination paper-ah khan education qualification-ah 'BA form Punjab University' tih a ziak thung niin petition-ah hian tarlan a ni.

He petition hi Justice MV Muralidan awmna, single-bench chuan ngaihtuahin, MLA atana Henry thlan tlin a nihna chu a hnawlsak ta a ni.

Henry hian 2017 assembly inthlanah khan vote 16,753 hmuin, BJP candidate Singhhian vote 12,417 a hmu a ni. Henry hi Manipur chief minister hlui Okram Ibobi Singh-a tupa a ni a, nikum August thla khan Congreess MLA dang panga nen an party hi chhuahsanin BJP an zawm a ni. BJP an zawm hnuah chief minister N Biren Singh chuan a cabinet minister paruk banin, mi thar panga a la lut a, an zingah hian Henry hi telin social welfare, coopertion and MAHUD ministry a chang.