GHADC inthlanah party mala sorkar siam thei awm lo

Meghalaya-a Garo Hills Autonomous District Council (GHADC) inthlan neihah party mala sorkarna siam thei an awm lo.

Seat 29 awmna, autonomous council inthlan hi April 12 khan neih a ni. Candidate 182 awmin, polling station 490-ah vote thlak a ni a, voter 7,43,717 an awm.

Congress chu party mala seat la hnem ber niin seat 12-ah hnehna an chang a, Meghalaya state-a rorellai National People's Party (NPP) chuan seat 11 an la. BJP in seat pahnih, Garo National Council (GNC)-in seat pakhat leh independent candidate-in seat thum an la bawk.

Kum 2015-a GHADC inthlanah khan NPP chu seat la hnem ber niin, seat 10 an la a, BJP leh GNC nena thawkhoin council-ah sorkar an siam a ni. Congress chuan seat pasarih chauh a la thung.

Party mala sorkarna siam thei an awm loh avangin, NPP leh Congress chuan party dang nena sorkarna siam dan tur kawng an zawng mek. Congress hruaitu James Sangma chuan GNC leh independent candidate-te chu thawhpui an tum dawn tih a sawi a, heith lai hian NPP pawhin council-ah sorkarna siam tuma hma an lak tur thu a sawi bawk.