Tripura-ah NLFT hel pahnih inpe

National Liberation Front of Tripura (NLFT) helpawl member pahnih chu Ningani khan North Tripura police kutah an ralthuam nen an inpe.

Hel inpete hi Uttam Kishore Jamatia, NLFT Biswa Mohan (BM) group-a self-styeld sepoy leh D Umthai group-a self-styled sergeant Joseph Jamatia te an ni.

Police-te chuan Uttam Kishore Jamatia hi NLFT-te'n beihpui an thlaknaah vawi tam tak telin, South Tripura-a Chechingcharra-a CRPF sipaite ambush a, sipai 17 an thahnaah te, CRPF bus pahnih ambush-naah leh mi rukbonaah te an tel niin an sawi. D Umthai command hnuaiah awmin, Dimapur kaltlanga Myanmar aṭanga ralthuam lakluhnaah a tel ṭhin bawk. Joseph Jamatia hi kum 2017-a Jampuijala police station hnuaia MNREGA fund, cheng nuai 18 rukbonaah khan telin Dimapur, Nagaland-ah 'town commander' angin a awm ṭhin a, NSCN-IM leh NLFT helpawten inthlunzawm atana an hman ber a ni tih police-te chuan an sawi.