Hmarchhakah BJP in LS seat 22 lak tum AGP in Saffron Party thawhpui leh dawn

Bharatiya Janata Party (BJP) chuan Lok Sabha inthlana hmarchhaka an thawhpui tur an tifel tawh a, hmarchhak state pariat, Lok Sabha seat 25 awmah seat 22 lak an tum tih party general secretary Ram Madhav chuan Nilaini khan a sawi.

Ram Mandhav hian Thawhlehni khan Assam a tlawh a, Nilaini khan Tripura tlawh lehin regio­nal party hrang hrangte meeting a neihpui a ni.

Mandhav kaihhruaina hnuaiah hian Thawhlehni zan, zanlai pelh thleng khan meeting hi an nei a, meeting-ah hian Asom Gana Parishad, Bodoland Peoples Front (BPF), Indigenous Peoples Front of Tripura (IPFT), National People’s Party, Nationalist Democratic Progressive Party leh Sikkim Krantikari Morcha-te nena thawkho tur hian thu an titlu ta a ni.

Nilaini khan Tripura Chief Minister Biplab Kumar Deb leh IPFT hruaitute chu Agartala-ah Mandhav hian meeting a neihpui leh nghal bawk. BJP Gen Secy chuan hmarchhak state pariat, seat 25 awmnaah seat 22 lak an tum tih sawiin Narendra Modi Prime Minister a nih leh theihna tur atan dinhmun pawimawh tak an nei dawn tih a sawi.

Thawhlehni khan Madhav hian Nagaland Chief Minister Neiphiu Rio, Assam Chief Minister Sarbananda Sonowal, Meghalaya Chief Minister Conrad Sangma, Manipur Chief Minister Biren Singh, Arunachal Pradesh Chief Minister Pema Khandu leh NEDA convenor Himanta Biswa Sarma-te meeting a neihpui a ni.

Madhav chuan Thawhlehni khan Dima­pur leh Guwahati-ah hruaitu pawimawh hrang hrang meeting a neihpui tih sawiin hmarchhaka party lian zawng zawngte chu an thurualpui thei ta tih a sawi bawk. Assam, Nagaland, Meghalaya, Manipur leh Arunachal Pradesh-ah chuan BJP, NPP, NDPP, AGP leh BPF an thawhpui dawn a, Congress an hneh dawn tih a sawi. Tripura-ah chuan IPFT nen an thawkdun dawn tih a sawi a ni.

BJP hian Sikkim-ah chuan eptu party lian ber Sikkim Krantikari Morcha an thawhpui dawn thung tih Madhav chuan a sawi. BJP Gen Secy chuan eptu pawl lamin ‘Mahagatbandhan’ (grand alliance) an sawi mek laiin anni chuan hmarchhak leh rampumah thawhhona ṭha tak an siam tawh tih a sawi. NDA chu tunhma zawng aiin a chak tawh zawk tih a sawi a ni.

Hmarchhaka BJP thawhpui hrang hrangte hi Citizenship Amendment Bill vang khan BJP nen an inkar kha a chhe hle hman a, mahse inthlan dawnah meuh chuan boruak a danglam leh ta niin a lang. BJP President Amit Shah bakah Assam Finance Minister leh NEDA Convenor Himanta Biswa Sarma-te pawhin CAB chu BJP chuan kalpui an la tum reng thu an sawi fo chunga a hmaa nasa taka dodaltu tena an thawhpui leh tho hian zawhna a siam nasa hle in a rinawm.

LS inthlanah hian BJP leh a thawhpui NDA/NEDA-te hian hnehna chang ta se, BJP hian Parliament-ah hmarchhak mipuite tana hlauhawm tak CAB hi rawn pulut leh ta se, a hma anga nasa khan an dodal leh ngam kher angem?

Assam-ah BJP-AGP-BPF March 16-ah candidate puang dawn
Assam regional party Asom Gana Parishad (AGP) chuan January thla khan Citizenship Amendment Bill, 2016 vangin BJP an thawhpuina titawp mah se Lok Sabha inthlan a nih dawn meuh chuan BJP nena thawkho turin thutlukna an siam leh ta!

AGP in BJP an thawhpui leh hi mi tam tak mak tih a ni a, sawiselna pawh a nasa hle a ni.

Assam finance minister leh BJP leader Himanta Biswa Sarma chuan BJP, AGP leh Bodoland peoples’ Front-te nen thawkho tura an inrem thu Nilaini khan a sawi a, March 16-ah an candidate tur an puang dawn tih a sawi.

Biswa Sarma chuan Congress hneh turin party pathumte chuan inthlana thawkho turin thutlukna an siam tih sawiin Narendra Modi chu PM-a siam leh an tum tih a sawi. Seat insem dan tur pawh tifel vek tawh mah se an parliamentary board chuan March 16-ah an puangchhuak dawn chauh tih a sawi a ni.

BJP leader Himanta Biswa Sarma chuan AGP minister pathum, CAB vanga an minister nihna dahte pawhin an chanvo an chelh chhunzawm leh dawn tih a sawi bawk.

Sarma chuan Citizenship (Amendment) Bill 2016 chungchanga BJP dinna chu a la ngai reng tih sawiin, CAB chungchanga AGP dinna pawh an hre reng a, AGP chuan an ngaihdan an thlak kher a ngai dawn lo tih a sawi. Mahse BJP leh AGP chuan CAB chungchang chu an la sawiho leh dawn thu leh Bill chu Assam mipuiten tam zawka an chhawr dan turte pawh an la hre chho zel dawn tih a sawi a ni.

Assam Finance Minister chuan hun lo kal zel turah BJP leh AGP chuan Bill chungchangah ngaihdan hrang an nei dawn lo tih sawiin, Assam mipuite chuan BJP, AGP leh BPF ṭangrual chu kum nga chhung an thlawp tawh thu leh term chu a huhoa an hmanzawh dawn thu a sawi.

Thawhlehnia Ram Madhav hoa meeting an neihah hian AGP president Atul Bora, Keshab Mahanta leh Phanibhushan Choudhury-te an tel a ni.

w Hmarchhaka BJP kaihhruaina hnuaia din North-East Democratic Alliance hi May 24, 2016 khan din a ni.
w BJP bakah hian Naga People's Front, Sikkim Democratic Front, People's Party of Arunachal, Asom Gana Parishad leh Bodoland People's Front-te chu member an ni nghal.
w Bharatiya Janata Party, Asom Gana Parishad (Assam), National People's Party (Meghalaya), Bodoland People's Front (Assam), Sikkim Democratic Front (Sikkim), Mizo National Front (Mizoram), Manipur Peoples Party (Manipur), Indigenous People's Front of Tripura (Tripura), Manipur Democratic People's Front (Manipur), Ganashakti Party (Assam) leh Nationalist Democratic Progressive Party (Nagaland)-te chu member an ni mek.
w Assam Finance Minister Himanta Biswa Sarma chu a tir aṭanga vawiin thleng hian Convenor atan ruat a ni.
w Hmarchhak pumpuia Chief Minister ni mekte hi NEDA-a BJP thawhpuite vek an ni.
w January 7 khan CAB vangin AGP in BJP an thawhpuina titawp.
w March 13-ah chuan AGP in BJP thawhpui thu puang leh.