AGP in mipui an phatsan: Congress

Assam Assembly-a opposition leader leh Congress hruaitu Deba­brata Saikia chuan Asom Gana Parishad (AGP) chuan Parliament-a Citizenship (Amendment) Bill pawm tumtu BJP an thawhpui lehna hmangin mipui an phatsan tih a sawi.

AGP chuan zahpuiawm takin saffron party an thawhpui leh tih sawiin, BJP in sorkar laipuia sorkarna an siam leh a nih chuan CAB chu an pulut leh dawn tih hrereng chungin an thawhpui leh tih a sawi a ni. Debabrata Saikia chuan thil­tihtheih chakna chuan regional party-te a hneh ta tih sawiin, BJP nena thawhdunna lehna hmang chuan AGP chuan Assam mipuite an phatsan ta a ni, a ti.

Bill chu dana siam a nih chuan Assam Accord, AGP hruaitute ngei a sign tuah pawh an telna chu awmze nei lo a ni dawn tih sawiin, mahse AGP chuan chutiang chu an ngaipawimawh lo niin a sawi. A ngaihdan chuan politics-a hun kalsualna leh a langa ṭhat tumna nasa ber a nih thu a sawi bawk.

Hetihlai hian Congress chuan Assam mipuite duhdan an la ngaipawimawh reng tih sawiin, Rajya Sabha-a Bill an hnawlna hmang khan Assam leh hmarchhak mipuite duhdan chu an vawnhim sak tih a sawi.

Saikia chuan mi ṭhenkhatin CAB chungchangah an party chu ngawi renga thlirtu anga lantir an tum tih sawiin, a nihna tak takah chuan Congress chu legislation-a dodaltu nasa ber leh Assam mipuite duhdan ngaipawimawh ber an ni tih a sawi bawk.

BJP leh a thawhpui ten thawhhona bawlhhlawh tak an siam chu Assam mipuite chuan an chhanglet ngei dawn tih a sawi a ni. Assam Pradesh Congress Committee hian a hma pawhin Twitter-ah party pahnih thawhdunna hi “sinister nexus” (Inzawmna rapthlak) tiin an lo sawi tawh a ni.

"BJP, AGP & BPF-te “sinister nexus” chu a lo kir leh ta. AGP in BJP an thawhpuina titawpa Assam mipuite nena dinhona lem an chan chu tarlan a ni. AGP chu Nagpur tune-ah an thiltihtheih duh vangin an lam. Assam mipuite chuan heng phatsantute hi inthlan lo awm turah hian zirlai an zirtir tur a ni," tiin Twitter-ah an post.