AGP hruaitu tlemte chauhin BJP thawhpui duh: Mahanta

Asom Gana Parishad (AGP) hruaitu hlun leh Assam chief minister hui ni bawk Prafulla Kumar Mahanta chuan Ningani khan AGP hruaitu tlemte chauhin BJP thawh­pui leh an duh tih sawiin, thutlukna siamtute pawh mi tlemte chuah an nih thu a sawi.

AGP chuanBJP nena thawhdun leh tur chungchang ngaihtuah tur member pakua awmna committee an din thu sawiin, amah ngei pawh member a nih thu a sawi. BJP nena thawhdun tura thu tihtlukna chu a democracy lo hle tih sawiin mi pali thutlukna angin an kal tih a sawi a ni.

Mahanta chuan AGP chuan Lok Sabha inthlanah thawhpui nei lo se tih chu a rilru a la nih reng thu sawiin, BJP nena thawhdunna chuan 2021 Assembly inthlanah AGP tan thil pawi a thlen dawn tih a sawi. AGP constitution-ah chuan hetiang thutlukna hi chu General House-a ngaihtuah ho tur a nih thu sawiin, tunah erawh mi tlemte chauhin thutlukna an siam tih a sawi a, chu chu a democracy kalphung lo hle a ni, a ti bawk.

Chief Minister hlui chuan AGP chhungah pawh in­hnialna a nasat thu sawiin mi ṭhenkhat chuan an duh ang anga thil an tih theih nan an party chhuahsan se an duh thu a sawi.

Inthlan a awm dawn apiangin Prafulla Kumar Mahanta chu Governor atan ruat a ni ang a, a nupui chu Lok Sabha ticket pek a ni dawn tia thuthang a awm ziah thu sawiin, an nupa chuan chutiang thil chu an duh ngai loh thu a sawi. Heng thu hi an nupa tihhmingchhiat tumna a nih thu a sawi bawk.

AGP leh BJP hi NEDA-ah thawkdunin Assam-ah pawh hian sorkarna an siam ho a, mahse Citizenship Amendment Bill vangin January khan AGP hian BJP an thawhpuina hi an titawp a ni. Hetiang hi ni mah se Thawhlehni zanlai khan BJP gen secy Ram Madhav hoa meeting an neih zawh hnuah AGP leh BJP hi LS inthlana thawkdun leh turin thutlukna an siam ta a ni. Hei hi mi tam tak chuan nasa taka sawiselin, AGP demtu pawh hi an tam hle a ni.