Assam sorkarin ramdang mi luh hukna avanga harsatna la thutak lo: SC

Supreme Court chuan Nilaini khan sorkar laipui leh Assam sorkar chu ramchhunga pawn lam mi luh hukna avanga harsatna awmte la thutak loah puhin a khak.

SC bench chuan fiamthu a nih tawh zawk thu sawiin, thilthleng chu a nasa tawh lutuk tih sawiin Assam sorkar hnenah chuan anmahni thu in ramchhunga dan loa lutte an chhuahtir thei lo chu a khak a ni.

Chief Justice Ranjan Gogoi, justice Deepak Gupta leh Sanjiv Khanna-te kaihhruai bench chuan Assam sorkar chu zawhna zawtin foreigners tribunal leh dan kenkawhna chu pangngai taka kalpui a ni em tiin an zawt. SC chuan Assam sorkar chuan dan loa ramchhunga lutte chungchangah hian hma engmah an la lo tih sawiin foreign tribunals chuan ramdang mi 56,697 an awm tih an finfiah laiin mi 900 vel chiah detention centre-ah an awm tih a sawi.

India sorkar leh Assam sorkar in ramdang mi lo lut chungchanga an hmalakna chu hriat an duh thu sawiin, Assam sorkar aiawha inlan Solicitor General Tushar Mehta chhannaah an lungawi lo tih an sawi a, thil awmdan chiang zawka sawi turin chief secretary leh home secretary koh an tum thu an sawi a ni.

Court chuan ramdang mite chu tute nge an nih emaw tute nge an manchhuah emaw leh tute nge ramdang mi nia an rinhlelhte pawh hrilh an ni lo tih sawiin, state chhungah foreign tribunal engzat chiah nge pangngai taka kalpui mek tih an zawt a ni.