Assam-ah lockdown puan tum lo Poll rally leh hri kai pungin inzawmna nei lo : Himanta Biswa Sarma

Assam health and finance minister Himanta Biswa Sarma chuan an state-ah Covid-19 hri kai pung zel mah se lockdown emaw, curfew emaw puan tumna a awm lo tih a sawi. Hemi rual hian an state assembly inthlan neih vanga election rally an neih ṭhin leh hri kai thar pun chhohna chuan inzawmna a nei lo tih a sawi.

Minister chuan Inrinni khan Guwahati Medical College and Hospital-a press meet a neihah he thu hi sawiin, hri kai thar tam zawk chu trading centre aṭanga kai an nih thu a sawi bawk.

Sarma chuan Covid-19 vaccine pawh stock an nei ṭha tih sawiin, Covidshield dose nuai 3.25 leh Covaxin dose nuai 2 an kawl mek tih sawiin, Covaxin dose nuai khat dang pawh a thleng leh thuai dawn tih a sawi.

State chhunga hri kai an pun chak leh chhanah assembly inthlan neih tur vanga election rally-a mi tam tak an punkhawm ṭhin vang nia sawi chu Minister chuan a dik lo nia sawiin, election rally neihna aṭanga hri kai thar report an awm lo a, candidate zingah hri kai pawh an awm lo a ni, a ti.

Assam assembly inthlan hi March 27, April 1 leh April 7 khan neih a ni a, political party hrang hrangte chu March thla aṭanga April 4 thleng khan campaign, hmun hrang hrangah rally-te an buatsaih a ni.

February thla khan Assam-ah Covid-19 active case hi 396-ah a tla thla hman a, March thlaah 875-ah kaiin, April 16-ah 4,528 an tling chho tawh a ni.

Health minister chuan, "Election rally leh Covid-19 kai thar punna hian inzawmna a nei em tih pawh kan zirchiang a, mahse rally neihna hmun aṭanga hri kai thar awm report engmah kan dawng lo. Kan bial chhungah bik pawh April 4 khan Suwalkuchi-ah rally neih a ni a, he rally neihna aṭang hian hri kai thar tumah an awm lo," a ti. An state-a hri kai an punna chhan chu state dang aṭanga lut, hri kaiten an chhungte leh midangte an kai darh vang zawk niin a sawi.

State dang aṭanga Covid-19 negative report lak chu Assam chuan a pawm dawn lo a, thlawhtheihna leh rel hmanga lutte chu Assam an thlenah Rapid Antigen leh RT-PCR test an tih ve ve a ngai dawn tih minister chuan a sawi bawk. An test result hi darkar 24 chhunga a chhuah zel tur thu sawiin, result chhuah hma chu an lo inkhung hran zel a ngai a ni, a ti.