Lok Sabha inthlan boruak Hmarhchhak hmun hrang hrangah sang

Lok Sabha inthlan a hnai zel a, hmarchhak hmun hrang hrangah inthlan tur boruak a sang zel a, party aiawha ding tur party hrang hrangin an puan bakah hmun ṭhenkhatah chuan inthlan kaihhnawihah hian buaina a chhuak ve mek zel a ni.

BJP thawhpui duh loin AGP office kawtah duh lohna lantir
Asom Gana Parishad (AGP) in BJP thawhpui leh tura thutlukna an siam chuan lungawi lohna a thlen nasa hle a, mipuite mai bakah party chhungah pawh buaina neuh neuh a awm niin a lang.

Inrinni khan Assam state khawpui Guwahati-a Ambari-a AGP headquarters kawtah AGP leh BJP thawhdun duh lo mi tam tak an pungkhawm.

AGP office kawta phungkawmte hi BJP nena thawhdun duh loin an aurual a, police leh CRPF-te pawh boruak sosang zel tur vengin a hmunah hian an kal hial a ni. AGP worker Sushil Deka chu duh lohna lantirtute a beih avangin man a ni a, kut a thlak zingah hian hmeichhia pawh an tel a ni.

Lungawi loh vangin BJP MP bang
Assam-a Tezpur constituency-a BJP MP Ram Prasad Sarmah chuan Inrinni khan BJP aṭanga a ban thu sawiin, a lungawi loh vanga bang a nih thu a sawi.

Facebook-ah a lungawi loh thu post in Ram Prasad Sarmah chuan BJP worker hlun tawh tak tak leh rei tawh takte chu party zawm tharte chuan an ngaihthah hle tih sawiin, hemi avang hian a rilru a na hle tih a sawi. Heng mite tan hian a auchhuak fo tih sawiin tunah chuan auchhuak tur an awm tawh dawn lo tih a sawi a ni.

Prasad Sarmah hian BJP a zawmna hi a rei tawh hle a, Rashtriya Swayamsevak Sangh leh Vishva Hindu Parishad-te pawh a ni tawh ṭhin bawk.

BJP in India rama khawiah pawh Biswa Sarma din phalsak
Assam Finance Minister, Himanta Biswa Sarma chu BJP chuan ramchhunga Lok Sabha seat a duhna berah a din an phalsak. Hei hi hmarchhaka BJP inzarpharhna atana a thawhhlawkna vang leh a bik takain Assam-a a chetṭhat vanga a lawmman nia tarlan a ni.

State BJP president Ranjeet Das chuan an party hruaitu ten Himanta chu khawi seat-ah pawh a ding thei tih an hrilh chuan thutlukna ropui tak a ni tia a chhan thu sawiin, state danga aiin Assam ngeiah a din theih nan duhsak bik se a duh thu a sawi bawk.

Thulakna in a tarlan dan chuan BJP chuan Tezpur constituency-ah Biswa Sarma hi dintit turin thu an titlu tawh a, an la puangzar lo mai chauh niin an tarlang.

AP-ah PPA in tumah thawhpui dawn lo!
Arunachal Pradesh Congress chuan kar liamta lawk khan Party of Arunachal (PPA) nen LS inthlanah an thawkdun dawn niin sawi mah se, PPA chuan Congress leh BJP an thawhpui dawn lo tih an sawi thung.

PPA Chairman Kamen Ringu chuan Inrinni khan BJP leh Congress-te chuan an MLA-te chu a hma pawhin an veh tawh tih sawiin, thawkho tur chuan an ring zo lo tih a sawi. Ringu chuan PPA chuan thawhpui an nei dawn lo tih a sawi bawk.

NPP in Manipur leh Meghalaya-a an party candidate tur puang
National People’s Party (NPP)-a Central Election Committee chuan an party Constitution Artice 13 in a duh angin 17th Lok Sabha Election awm turah Manipur leh Meghalaya constituency-a an party aiawha ding tur an puang.

Manipur-a Outer Manipur (ST) constituency-ah Thangminlein Kipgen a ding dawn tih tarlangin, Meghalaya Tura Constituecy-ah chuan Agatha K. Sangma a ding dawn tih an tarlang. Meghalaya-ah hian MDA chu an thawkho leh dawn a, mahse BJP chuan candidate hran an siam dawn thung a ni.

Nagaland Congress aiawhin KL Chishi ding dawn
Nagaland Pradesh Congress Committee chuan Lok Sabha inthlana an party aiawha ding turin chief minister hlui KL Chishi chu ruat a nih thu an tarlang a, Aonglenden assembly constituency inthlanag chuan Alemjongshi Longkumer a ding dawn thung.

NDPP Lok Sabha MP, Tokheho Yepthomi leh KL Chishi-te inkar boruak hi a lian hle tura ngaih a ni a, anni pahnih hi state chhungah pawh mi langsar tak ve ve an ni.