Tripura: IPFT in candidate hran puang

Kar liamta lawkah BJP nena an thawhdun tur thu puan a nih hnuah Indigenous Peo­ple’s Front of Tripura (IPFT) chuan Inrinni khan state Lok Sabha seat pahniha an candidate tur hming an puang a, mi tam tak a ṭhawng hle tura ngaih a ni.

Tripura East seat-a ding turin IPFT hian party President leh Revenue Minister ni bawk Narendra Chandra Debbarma chu an thlang a, youth leader Sukhla Charan Noatia chu Tripura West seat-ah a ding thung ang.

IPFT in thuchhuah an siam hnu lawk hian BJP thupuangtu Nabendu Bhattacharjee chuan IPFT chu an thutlukna siam ngaihtuah ṭha leh turin leh candidate an siam tawhte chu sut leh tura an ngen dawn thu a sawi. IPFT Central Executive Committee chuan nilenga meeting an neih hnuah IPFT General Secretary leh Forest Minister ni bawk Mever Kumar Jamatia chuan an thutlukna hi a puangchhuak a ni.

Media miten an kawmnaah Debbarma leh Jamatia chuan BJP hnenah hian tribal tana reserve a nih angin Tripura East-a an party hminga candidate siam chu an dil fo tih sawiin, an rawtna thlen chu BJP chuan an hnawl avangin candidate chu an siam ta tih a sawi.

Hetih lai hian NDA an chhuahsan loh thu a sawi thung a ni.