PM in min ngen chuan BJP-ah Ka let leh maithei: Ram Prasad

Assam-a BJP Lok Sabha MP Ram Prasad Sarmah chuan Inrinni khan BJP a chhuahsan thu sawi mah se Pathianni khan Prime Minister Narendra Modi-an a ngen a nih chuan BJP-ah a let leh maithei tih a sawi.

Ram Prasad Sarmah chuan PM in a ngen a nih chuan BJP-a a let leh a hreh loh thu a sawi bakah Lok Sabha inthlanah pawh a ding maithei tih a sawi bawk a ni.

BJP lamin an sawi dan chuan sorkar laipuia hotute chuan Sarmah banna hi an la pawm lo a, state unit-te chu an candidate siam ennawn leh turin an hriattir a ni. BJP in candidate an siamah hian Tezpur MP Sarmah hi a tel lo a ni, Prasad Sarmah chuan a ban thu a sawi hnu khan TMC, NPP, Congress leh party dangte pawhin an party zawm turin an sawm tih a sawi a, mahse tun dinhmunah chuan eng party mah zawm a tum hrih lo tih a sawi.

Sarmah chuan a profession pangngaiah let leh a tum tih sawiin, mahse Prime Minister Modi leh party president Amit Shah-ten an ngen chuan Tezpur-a ding leh turin BJP a zawm leh maithei tih a sawi bawk.

Ram Prasad chuan Facebook-ah BJP in ticket a pe thei lo a nih chuan a ṭhiante leh mi tam takin party dang zawm a tum leh tum loh thu an zawt tih sawiin, mahse eng party mah zawm a tum lo tih a sawi. 1976 aṭangin RSS-a Swayem Sevak a nih thu leh RSS chu a thisenah leh a thawah thlengin a awm a, chumi avang chuan a thih thlengin ideology emaw philosophy emaw dang a zawm thei lo tih a sawi.

Party dang zawm loin dan lamah bawk lutin, Assam mipuite, a bikin Tezpur tan hna a thawk leh mai dawn tih a sawi a ni.

Sarmah hi Gorkha community mi niin, 2014 khan a vawikhat nan Tezpur constituency-ah thlantlin a ni a, Tezpur-ah hian Gorkha an tam hle bawk. A khingpui Congress candidate chu vote 86,000 in a hneh a ni.