AP district pariat-ah cyclone tleh Power supply tibuai nasa

Arunachal Pradesh-a district pariat- Leparada, Lower Siang, West Siang, Siang, East Siang, Lower Dibang Valley, Lohit leh Namsai-te chu Zirtawpni khan cyclone na takin a nuai a, power supply pawh a tibuai nasa hle.

Superintending Engineer (E) TK Tara chuan cyclone hian Leparada district-a Bam check gate bula awm, 132 kv power transmission line tower (no 166) chu a tihchhiat avangin heng district pariatah hian power supply a mumal loh phah tih a sawi.

Inrinni chawhnu lamah pawh khan cyclone hi a la tleh leh a, East Siang district-a khaw ṭhenkhatah chuan in, thlai, electric pole leh buh dahkhawmna hmun te a tichhe nasa hle bawk. Report in a tarlan dan chuan Aohali thingtlang khua chuan an tuar nasa hle a ni.

Thlipui tleh hian thlai mai bakah thingkung leh mau a tichhe nasa hle bawk a, kawngpuite pawh darkar eng emaw chen chu kaltlang theih lohin thing leh mau tlu te hian an dang bawk.

Inchung eng emaw zat la bawk a ni.

Electric chhiate siam ṭha hian electric department lam pawhin hma an la mek nia tarlan niin, Circle Officer Kabang Apum pawh thlipui tlehna hmunah hian kalin thil awmdan a enfiah nghal a ni. Thi leh hliam an awm thu report a awm lo thung.