Dikshit-in Delhi-a AAP leh Congress thawhdun duh lo

Congress party Delhi unit chief Sheila Dikshit-i chuan Lok Sabha inthlanpui lo awm turah Delhi-a Aam Aadmi Party (AAP) thawhpui chu a duh lo a, an thawhpui chuan hun kal zel turah Congress tan a ṭha lo zawk dawn niin a sawi.

Sheila Dikshit-i hian Thawhṭanni khan AAP nena thawhdun a duh loh thu hi Congress president Rahul Gandhi hnenah ziakin a thlen a ni. Party worker-te rilru tihbuai a nih lohna turin AAP nena thawhdun tumna awm nia sawi chungchangah thu chiang puang chhuak thuai turin a ngen.

Dikshit-in AAP nena thawhdun duh lo mah se, senior Congress leader PC Chacko chuan BJP duh lotu party dang nena thawhdunna tura Congress policy siam chu Delhi hruaitute pawhin an zawm ve a ṭul thu a sawi. Rahul Gandhi chuan thutlukna a siam thuai tur thu sawiin, BJP hneh chu thil pawimawh hmasa a ni a, hemi atan hian AAP nena thawhdun chu a ṭul dawn nia hruaitu tam zawkin an ngaih thu a sawi.

Congress party hian AAP hotu Kejriwal-an inthlanpui neih tura thawhdun a rawtna chu a lo hnawl tawh a, mahse a hnuah central-a rorellai BJP chu hneh ngei an nih theihnan thawhdun chungchang hi a sawipui leh a ni. Delhi vote chungchang an zirnaah BJP chu vote bank nei ngah berin 35% vote share a nei pha a, AAP hian 28% leh Congress-in 22% vel nei anga chhut a ni.