AP: State BJP Gen. Secy bang

Tunlaiin hmarchhak hmun hrang hrangah BJP tana thu lawmawm loh hriat tur a awm zeuh zeuh a, Arunachal Pradesh-ah pawh an boruak a ṭha vak lo niin a lang.

Arunachal Pradesh BJP General Secretary Jarpum Gamlin chuan Thawhṭanni khan candidate tur list hming 54 tarlan zingah a hming a awm ve loh avangin party a chhuahsan. BJP Parliamentary Board-te chuan Pathianni chawhnu khan candidate tur list hi an tichhuak a ni.

Jarpum Gamlin chuan Assembly inthlana din ngei tum hian Liromoba mipuite bulah ṭan a la nasa ve hle tih sawiin, an party pawhin chu chu an hre reng tih a sawi. Hetiang a nih avang hian amah thlawptute leh amaha rinna nghattute beiseina chu a tithlawn thei lo tih sawiin, hemi a nih vang hian BJP member a nihna aṭang chuan a bang ta tih a sawi.

Jarpum Gamlin hian Arunachal Pradesh BJP President Tapir Gao hnenah a banna hi a thehlut a ni.

Arunachal Assembly-ah hian seat 60 awmin Pathianni tlaiah khan BJP hian an candidate tur hming list 54 tichhuakin, minister ni lai Kumar Waii leh Jarkar Gamlin-te hming a tel ve lo a, MLA dang pakua pawh list-ah hian an tel lo a ni. Hei hian party chhungah buaina a thlen rin a ni bawk.

Home Minister Kumar Waii tlinna bial Bameng-ah hian Goruk Pordung chu dah niin, Tourism Minister Jarkar Gamlin dinna mek Along East-ah chuan Kento Jini chu dah a ni thung.

Kumar Waii chuan a ticket a hloh chhan chu Chief Minister Pema Khandu chuan amah beitu nia a ngaih vang nia sawiin, hemi vang hian ticket pek a ni ta lo tih a sawi.