Sikkim-in hun vawng dik lo officer-te hming tichhuak

Sikkim sorkarin an state-a sorkar hnathawk, officer-te hun vawng dik tura a tih hnuah, chief secretary office chuan officer hun vawng dik lo, dar 10.30 hnu lama an office thlengte hming list a tichhuak.

Sikkim chief minister Prem Singh Golay chuan kar liam ta khan sorkar hnathawkte chu working hour, chawhma dar 10:30 leh tlai 4:40 inkar chu dik taka zawm turin a lo hriattir tawh a ni. Hemi hnu, Zirtawpni liam ta khan officer, additional secretary chin chunglam, dar 10:30-a an office thleng hman lo mi 11 hming chu tichhuakin, heng officer-te hi an kal tlai ni hi 'extraordinary leave without pay' angin kaltir a ni zui bawk.

CM chuan hnate a hun taka thawh a, zawhfel a nih theihna turin hun vawn dik a pawimawh tih a sawi a, "State chhung hmun hrang hrang aṭanga an hna thil avanga official hmu tura lo kalte chuan officer-te hun vawn dik loh vangin harsatna an tawh phah fo a ni. Hei vang hian Gangtok-ah an tum aia rei an cham te a ngaih phah ṭhin. Official-te chu mipuiten an dawr thei reng tur a ni. Hun vawn dik tur tih hi tumahin an palzam tur a ni lo," a ti.

Chief secretary-in a ruat, inspecting officer-te chuan punctuality drive hi an kalpui dawn a, office hrang hrangah hnathawktu enfiahin suprise check pawh an nei ṭhin dawn a ni.