Covid-19 : Hmarchhak state-ah night curfew leh zirna in khar

India rama Covid-19 hri leng thawh hnihna thleng mek chu hmarchhak state hrang hrang pawhin an tuar a, hri kai an pun belh chak hle. Hei vang hian hmarchhak state-te chuan hri darh tur venna atan kawng hrang hrangin hma an la chho leh a, state ṭhenkat chuan zan lam curfew te puangin, zirna inte pawh an khar bawk.

Assam health and family welfare minister Himanta Biswa Sarma chuan an state chhunga district thuneitute hnenah, an district-a Covid-19 active case 100 aia tam an awm chuan lower pimary school-te chu khar turin a hriattir.

Pathianni khan Assam-ah hian hri kai thar 639 awm belh lehin, hemi ni vek hian hripui vanga thi mi paruk an awm bawk. Assam-a Covid-19 kai hmuh chhuah hi 2,24,455 an tling tawh a, an zinga mi 1,135 chu hripui vangin an thi tawh bawk.

Manipur sorkar chuan hri leng thar leh avangin state pumah zan lam cufew a puang tawh bawk. Meghalaya leh Sikkim pawhin an state khawpui bikah night curfew hi an puang bawk a ni.

Hetih lai hian Tripura chuan zan lam curfew emaw, lockdown emaw puan a ni dawn lo tih a sawi thung. Mahse hri darh tur venna atan state chhunga zirna in, primary aṭanga university level thlengin tiam chin awm loa khar a ni thung.