Assam CM hlui Bhumidhar Barman a thi

Assam chief minister hlui Bhumdihar Barman chu Pathianni tlai khan kum 91 mi niin Guwahati-ah a thi.

Congress party hruaitu hlun, Barman hi kum April, 1996 - May,1996 khan Assam CM a ni. Kum 1967 khan Assam assembly inthlanah a ṭum khatna atan MLA-ah thlan tlin a ni. MLA hi term sarih chhung thlan tlin a ni a, Nalbari West aṭangin ṭum hnih, Dharmapur bial aṭangin ṭum khat leh Barkhetri bial aṭangin ṭum li thlan tlin a ni.

Barman hi tun hnaiah a hriselna a ṭha loin, hun rei tak enkawl a ni tawh. Guwahati-a Dispur Hospital-a ICU-ah hun eng emaw chen enkawl a nih hnuin Pathianni tlai khan a thi a ni.

Prime minister Narendra Modi, Assam chief minister Sarbananda Sonowal leh political hruaitu hrang hrangte chuan Barman an ui thu leh, a chhungte an tawrhpui thu an sawi. Congress party-a unit hrang hrang pawhin Barman an ui thu hian an sawi bawk.