Garo Hills Council thar session hmasa ber nei
Meghalaya-a Garo Hills Autonomous District Council thar session hmasa ber chu nimin khan neih a ni a, councillor tharte rinawmna thu tiamtira lakluh an ni.
Session hi Tura-a District Council Hall-ah chawhma dar 11-ah neih a ni. Member tharte lakluh a ni hnuah inkhawm hi titawpin, naktukah Council chairman thar tur an thlang ang.
National People's Party (NPP) chuan an party councillor 11 bakah independent pathum leh Garo National Council (GNC) party councillor pakhat puihnain Garo Hills Council-a Executive Committee an siam thei tih an sawi. Party mala seat la hnem ber, seat 29-a seat 12 latu Congress chu eptu lamah an awm dawn thung a ni.
NPP kaihhruai ṭangrual pawh hian chief executive member candidate atan NPP councillor Benedic Mark ruatin, deputy CEM atan GNC councillor Nikman Marak a ruat bawk. Chairman candidate atan NPP member Rakesh Sangma ruat a ni bawk.