Tripura : BJP-in tribal council member thar lakluh inkhawm boycott

Tripura-a rorellai, Bharatiya Janata Party (BJP) chuan nimina Tripura Tribal Areas Autonomous District Council (TTAADC) member thlan tharte lakluh inkhawm buatsaih chu a boycott.

BJP chuan swearing-in ceremony a boycott chhan hi TTAADC inthlan zawh hnua Tipraha Indigenous Progressive Regional Alliance (TIPRA) mi leh saten buaina siam a, tharum thawhnate an thlen vang niin an sawi.

TTAADC inthlanah hian TIPRA leh a thawhpui Indigenous National Party of Twipra (INPT) chuan hnehna changin, seat 30 awmnaa inthlan buatsaihna, seat 28-a 18-ah hnehna an chang a ni.

BJP hruaitu leh council member thlan thar, Bimal Kanti Chakma chuan TTAADC inthlan result puan hnuah state chhung hmun hrang hrangah pawikhawihna leh tharum thawhna a thleng niin a sawi. "ADC area-a buaina chhuakte chu TIPRA mi leh sate siam a ni. Hmun tam takah boruak ṭha lo tak an thlen a, hetiang thil hi kan la tawng ngai lo," a ti. Hei vang hian district council-a BJP member thlan thar pakuate chuan member thar lakluh inkhawm hi an boycott tih sawiin, Governor hnenah pawh BJP member-te lakluh hun hi a hrana siamsak mai tura an ngen thu a sawi.