AICC Chief Rahul Gandhi hmarchhakah campaign

All India Congress Commi­ttee President Rahul Gandhi chuan Thawhlehni leh Nilaini khan Arunachal Pradesh, Tripura leh Manipur tlawhin Lok Sabha bakah Assembly inthlan awm tur atana campaign a nei.

Arunachal Pradesh
Arunachal Pradesh state khawpui Itanagar-a Indira Gandhi Park Ground-ah Nilaini khan thu sawiin, Congress chuan thuneihna an chang a nih ngat chuan hmarchhak tana special status category pek ṭhin chu chhunzawm a ni leh dawn a, Northeast Industrial policy pawh kalpui a ni leh dawn tih a sawi.

Itanagar-ah hian campaign poll kick off na neiin Pradesh Congress Committee (PCC) meet bakah District Congress Committee (DCC)leh Block President-te kawmna hun a hmang a, civil society-te nen pawh inkawmna hun an hmang bawk a ni.

Rahul Gandi chuan Arunachal Pradesh history, ṭawng leh tihdan phungte chu an tihbuai ngai loh thu sawiin an tibuai ngai dawn bawk lo tih a sawi. Arunachal Pradesh chu khawvel ramdang nen infrastructure hmanga thlunzawm an tum tih a sawi bawk. Citizenship Amendment Bill (CAB) chungchang pawh sawiin, thuneihna pek an nih phawt chuan CAB tihbo chu an tih hmasak ber tur a ni tih a sawi.

Rahul chuan BJP chuan CAB kalpui an duh tih sawiin, chu chu hmarchhak tihchaklohna tur a nih thu a sawi a, hmarchhak history leh tihdan phungte chu ram chakna nia an hriat thu a sawi a ni.

Manipur
Thawhlehni tlai dar 4:30 velah khan Manipur panin Manipur Pradesh Congress Committee Office, Imphal-ah PCC meeting a neihpui nghal bawk. Thawhlehni tlaiah vek hian Manipur State Film Development Society zirlaite nen inkawmna nei nghalin, Prime Minister Office chu tunah chuan Publicity Minister Office-ah a chang tawh tih a sawi.

Congress chuan “cultural imperialism” chu an rin ve loh thu sawiin ramchhung hmun pakhatin ramchhung hmundang chu an awp tur a ni lo tih chu an ngaihdan a nih thu leh state tinin aw an neih ṭheuh chu inzah­tawnsak tur a ni, a ti. Mahse chu chu Narendra Modi kaihhruai sorkar laipui kalphung chu a ni ve lo tih a sawi,

Rahul chuan ramchhung hmun tina mite chu an ngaihdan sawi remtihsak an ni tur a nih thu sawiin, BJP-RSS ṭangrualte chuan an ngaihdan kalpuia midang ngaihdan chu tihchhiat vek an tum tih a sawi bawk.

Congress Chief chuan hna chungchanga hmarchhaka harsatna sutkian leh inkalpawh-na tihṭhat chu an party in an ngaihpawimawh ber a nih thu a sawi a ni.

An party hmuhdanah chuan hmarchhak chu manufacturing hub atana hmun ṭha tak a nih thu leh dahkhawmna hmun a ṭhat tawk loh avangin agricultural sector, thlai leh chaw lamah te thil tamtak chu khawhralin a awm tih a sawi a, Manipur-ah chuan food processing industry a din theih tih a sawi.

Rahul Gandhi hian nimin khan Tripura tlawh turin rua­hmanna a siam bawk a, mahse he thu ziah lai hian chanchin kim­chang hriat hman a ni lo a ni.