AP: BJP hruaitu 25 in party chhuahsan tawh

21st March, 2019

Arunachal Pradesh unit Bharatiya Janata Party (BJP) chuan candidate siam chungchangah harsatna an tawh belh zel a, Nilaini pawh khan candidate siam chungchanga lungawi loh vangin an party hruaitu 18 chuan party an chhuahsan.

BJP chhuahsan zingah hian minister pahnih leh MLA paruk an tel a ni. Heti hian kar khat chhung lekin party hruaitu 25 in BJP hi an chhuahsan ta a ni.

Assembly inthlana party candidate tur puan chungchanga lungawi loh vangin party hi an chhuahsan nia tarlan niin, Meghalaya Chief Minister Conrad Sangma kaihhruai National Peoples party (NPP) an zawm dawn nia tarlan a ni. NPP hi BJP thawhpui ni mah se tun inthlanah hian thawhpui neih an tum lo thung.

Nilaini-a party chhuahsante bakah hian state BJP General Secretary Jarpum Gambin chuan party a chhuahsan tawh bawk a, Nilaini khan Home Minister Kumar Waii, Tourism Minister Jarkar Gamlin leh MLA paruk dangte chuan an chhuahsan ve leh a ni.

Home Minister Kumar Waii chuan, "BJP chuan Congress chhungkaw rorelna chu sawisel ṭhin mah se Arunachal Pradesh en teh u, CM chhungkua mi pathumin ticket an neih hi!", tiin a sawi.

NPP leader Thomas Sangma chuan NPP chuan tunah chuan candidate 30-40 an file thei tawh dawn tih sawiin, hnehna an chang a nih phei chuan anmahniin sorkar an siam dawn tih a sawi. Arunachal-ah hian Assembly seat 60 a awm a ni.

Jarkar Gamlin chuan a hmain party ticket a chang dawn lo tih chu hre lawk ni se chuan party a chhuahsan kher lo maithei tih a sawi a, duhthlanna chu an party leh kum thum a kaihhruai tawh a mipuite inkar a nih thu sawiin, mipuite chu a thlang ta zawk tih a sawi. Electoral politics-ah chuan party aiin mipuite chu an pawimawh zawk tih a sawi a, amah thlawptute thutlukna angin a kal ta tih a sawi.

Union Minister leh BJP hruaitu Kiren Rijiu kaihhruainain BJP central election committee chuan an candidate turte hi an siamfel a ni. BJP hian an candidate tur hming 54 an puangchhuak tawh a ni.

Hetihlai hian NPP lam hian nimin khan an candidate tur puanchhuah an tum ve thung a, he thu ziah lai hian chanchin hriat hman a ni lo thung.