Nagaland Congress: Naga buaina chinfel tiam Citizenship Amendment Bill tihbo tiam bawk

Nagaland Congress chuan Lok Sabha inthlana hnehna an chang a nih phawt chuan kum 20 chhunga chinfel hleihtheih loha awm mek, Naga politics buaina chu chinfel an tiam.

Nagaland Pradesh Congress Commi­ttee president K Therie chuan buaina chinfel tur chuan chance khat pe leh tura mipuite chu sawmin, kan tihlawhtling thei lo a nih chuan min paihchhuak leh mai dawn nia, tiin a sawi.

Naga politics buaina chinfelna atan hian NSCN(IM) leh sorkar laipui chuan framework agreement 2015 khan ziak tawhin, Naga nationalist political group parukte nen pawh remna zawnga inbiakna hi neih a ni tawh a, mahse vawiin thleng hian buaina hi chinfel a la ni lo.

NPCC chief chuan Indian National Congress leh Nagaland Congress hruaitu hmasa te chuan politics buaina chinfelna hi an pe tawh tih sawiin hemi avang hian state pawh an nei tih a sawi a, Constitution Article 371(A) hnuaiah venhim an ni bawk tih a sawi.

Nagaland Congress chuan thuneihna an chang a nih chuan dodal hlawh tak Citizenship Amendment Bill chu an tibo dawn tih an sawi bawk.

Inrinni-a thuchhuah an siamah NPCC chuan sorkar laipuiah thuneihna an chang a nih phawt chuan Congress chuan CAB chu an nuaibo dawn tih tiamin, an rinna chu eng kawng pawha an venhim a ngai tih an tarlang a ni.

Congress chuan Asssam political party- Asom Gana Parishad chuan an rinna an tihlawhchham tih sawiin ram mipui hmaah zahpuiawm takin an awm tih a sawi. CAB vangin NDA leh NEDA aṭangin inhnukdawk mah se kar liamta lawk khan BJP chu an thawhpui leh tawh tih an sawi. Amit Shah-an sorkarna an chang leh a nih chuan CAB chu an pharh leh dawn tih a sawi reng chungin, BJP chu an thawhpui a, hei vang hian ram mipuite chuan hmarchhak lakah ngaihdan ṭha lo tak an neih phah tih sawiin Nagaland-ah chuan a thleng nawn tawh tur a ni lo, tih an sawi.

Amit Shah-a idea, Nagaland mai ni lo, hmarchhak pum duhdan kalh chu an hneh a ngai a ni, an ti bawk.

LS inthlanah hian Nagaland-ah Congress aiawh hian Chief Minister hlui KL Chishi chu a ding dawn a ni.