Women's Super League a hlu thar dawn

Football Association chuan hmeichhe football tih hmasawn an tum zelna kawngah Barclays nen contract thar an ziak a, hmeichhe league sang ber Women's Super League pualin Barclays hi kum thum chhung atan contract an ziahpui.

Barclays hian kum thum chhung atan hian WSL hi pound maktaduai 10 chuangin an pui dawn a, FA chuan he inremna hi hmeichhe infiamna bikah chuan UK-a inremna sum tamna ber a la nih thu an sawi.

WSL hian sponsor thar an neih tak avang hian inelna hming pawh hi Barclays FA Women's Super League tih a ni tawh dawn a, he league-a telte tan £500,000 (Nuai 455.24) chu prize money-ah sem ral a ni dawn bawk.

Women's professional game director Kelly Simmons chuan, "WSL hi khelmual chhung leh pawn lama league hlawhtling ber pawl nih tir kan tumna kawngah tuna kan hmalakna hian nasa takin min pui dawn a ni," tiin a sawi.

Kum 2011 khan WSL hi khelh ṭan niin team pariat an tel a, tunah erawh team 11 inel tawhin Europe-a hmeichhe professional football league, 'full time' player chauh telna an khelh awmchhun a ni.