RSS in ram an kaihhruai kan remti lo ang : Rahul Gandhi

Congress President Rahul Gandhi chuan Nilaini khan Tripura tlawhin, state khawpui Agar­tala bul, Tripura Tribal Areas Autonomous District Coun­cil head­quarters Khu­mulwng-a thu a sawinaah Rashtriya Swayamsevak Sangh (RSS)-ten ram an kaihhruai an remti dawn lo tih a sawi.

Rahul Gandhi chuan RSS-te chu ram kaihhruai an phalsak dawn lo tih sawiin a bik takin ram mipui leh hmarchhak ramte chu an kaihhruai an phal dawn lo tih a sawi a ni. Modi sorkar chuan Nagpur aṭanga RSS in rampum leh hmarchhak chu thunun tir an duh tih sawiin, Congress chuan engti kawng mahin an remti dawn lo tih a sawi a ni.

Rahul chuan ram mipuite leh hmarchhak mipuite chuan anmahni ram ngei an kaihruai tur a ni, a ti. Kumin Lok Sabha inthlan chu Congress ideology, hmangaihna tel leh Bharatiya Janata Party ideology, inhuatna inkara inbeihna a nih dawn thu sawiin, BJP chu India culture, history leh ṭawngte tichhiaah a puh.

Congress chief hian Khumulwng-ah minute 25 vel thu sawiin Hindi-in thu a sawi a, loneituten an loan ngaidam tura theihtawp an chhuah laiin Modi leh Finance Minister Arun Jaitley-te chuan chutiang dan a awm lo tih sawiin sumdawng lian Nirav Modi, Mehul Choksi leh midangte lakah pawisa tam tak an chheprelh leh thung si tih a sawi.

UPA sorkar in loan cheng vaibelchhe 70,000 an ngaihdam thu sawiin Rahul chuan Chhattisgarh, Madhya Pradesh leh Rajasthan-a Congress sorkar tharin ni hnih chhung leka loan tam tak an ngaihdam chungchang pawh a sawilang bawk. Modi sorkar chu bei zuiin mipuiin harsa taka pawisa an thawhchhuah chu rukru-ten an neih theihna turin an ṭanpui niin a puh.

Rafale jet deal chungchang chhuichian duhtu Central Bureau of Investigation Director pawh ban a nih bakah ṭhalai tam takin hna an chan bawk tih Gandhi chuan a sawi a ni.

AICC President chuan Narendra Modi chu mipuite chanai, a bik takin loneitute leh miretheite chanai chhuhsakah a puh a, chutih laiin sumdawng hausate hlawkna tam tak peah a puh bawk. Congress in sorkarna an siam a nih chuan mipuite chuan hamṭhatna an dawng dawn a ni, a ti.

Demonetisation pawh bei bawkin kum riat mi naupang pawhin Modi-a demonetisation hnua nghawng ṭha lo tak chu a hrethiam a ni, tia sawiin amah Modi chuan a thutlukna avangin thil engzat nge a tihchhiat erawh a hre lo niin a sawi.

BJP President Amit Shah-an sorkarna an chang leh a nih chuan Citizenship Bill pharh leh an tum thu a sawi chungchang pawh sawichhuakin, Congress chuan hmarchhak leh ramchhung hmundanga awmte pawhin an duh angin CAB chu an dodal zel dawn tih a sawi a ni.

Hmarchhak tana special status pek ṭhin pawh chhunzawm a ni leh dawn tih sawi lehin Modi sorkar chuan paihbo tawh mah se an tinung leh dawn tih a sawi. Rahul Gandhi-a campaignaah hian State Congress President Pradyot Bikram Manikya Debbarman, Congress Secretary Bhupen Bora leh tribal leader Animesh Debbarma-te pawhin thu an sawi a ni.

Congress chuan a hmaa thuchhuah an siamah Nilaini khan an party Lok Sabha candidate tur an puang dawn tih sawi mah se, puan a ni ta lo thung.

BJP in Tripura ṭhalai nuai 7.5 hnenah hna an pe em?
AICC President Rahul Gandhi chuan Tripura unemployment rate chu a sang hle tih sawiin tunah hian state chhungah ṭhalai hna nei lo nuai 7.5 dawn an awm tih a sawi.

Rahul Gandhi chuan, "Tripura ṭhalaite zawhna ka zawt duh a ni- BJP in Tripura ṭha­lai nuai 7.5 hnenah hna an pe em?", tiin zawhna a siam hial a ni. Ram leilung fate ṭanpuina turin Tribal Bill kan siam a, mahse Narendra Modi chuan chu Tripura dan chu a tichhia a ni, tiin a sawi.

Rahul Gandhi hian Thawhlehni khan hmarchhak campaign kick-off chu Arunachal Pradesh state khawpui Itanagar-ah neiin, Thawhlehni tlaiah khan Manipur a pan a, Manipur-ah zan riakin Nilaini khan Tripura hi a pan leh a ni.