Meghalaya: SC in ruang lakchhuah chungchangah zawhna zawt

Supreme Court chuan Meghalaya lungalhthei khura tang, ruang ṭawih nasa tawh tak takte chu lakchhuah an nih leh nih loh tur chungchangah an chhungte rawnin, lakchhuah an duh leh duh loh a zawt.

Meghalaya East Jaintia Hills Ksan khuaa lungalhthei khura tangte hi nikum December 13 aṭang khan an tang tawh a, thla thum chuang zet an tan tawh avangin an ruang pawh a ṭawih chhe nasa tawh hlawm hle nia tin a ni.

Justices SA Bobde leh SK Kaul-te chuan lungalhthei khur chungchanga petition lut an ngaihtuahnaah petition thehluttute chu tang chhungte hnenah ruang lakchhuah an duh leh duh loh zawt turin a hriattir.

Court chuan Dr Sudhir Kumar, Roorkee’s National Institute of Hydro­logist-a Hydrologist chu a hmun enfiah tura hriattirin, tui pump chhuah hna kalpui chungchangah report thehlut turin a hriattir bawk. Bench chuan hun kal zel turah engtia hmalak tur nge tih ruahmanna siam turin a ti bawk a ni.

Ksan lungalhthei khura tangte ruang lakchhuah hna hi India Navy leh NDRF-te chuan theihtawpin an thawk a ni. Ruang pathum hmuh zinga ruang pahnih lakchhuah ni tawhin ruang pakhat dang erawh lakchhuah a nih leh nih loh report a la awm lo thung. Heng ruang hmuhte hi an ṭawih chhe tawh hlawm hle a ni.