BJP in hmarchhaka an candidate tur list hmasa ber tichhuak

Bharatiya Janata Party (BJP) chuan Ningani khan kumin Lok Sabha inthlana an candidate tur list hmasa ber tichhuakin, state 20-a candidate tur hming 182 an tichhuak.

Hmarchhak bikah chuan hming langsar tak tak eng emaw zat an tel laiin hmarchhaka BJP khaidingtu bera ngaih, Assam Finance Minister Himanta Biswa Sarma hming erawh a tel ve lo thung.

Hei vang hian sawi neuh neuh a tam hle a, BJP national President Amit Shah chuan sawi­fiah nghalin, Assam election selection committee leh Assam BJP member-te chuan Himanta Biswa Sarma chu LS inthlana ding turin rawt mah se North-East Democratic Alliance (NEDA) leh sorkar laipuia BJP hruaitute inrawn chuan, Himanta chu Assam minister la ni chhunzawm se an duh thu a sawi.

NEDA chairman nih chhun­zawm chunga Assam leh hmar­chhaka party hmasawnna kawnga la thawk chhunzawm tura an duh thu a sawi a ni.

Amit Shah chuan Assam BJP unit leh BJP chhungkaw pum chuan an thutlukna chu an pawmsak a beisei thu sawiin, an thutlukna chuan Assam leh hmarchhaka an party ṭhanna leh hmasawnna a thlen ngei a rin thu a sawi.

Hmarchhak bikah chuan Manipur, Mizoram, Sikkim, Assam, Tripura leh Arunachal Pradesh-a an candidate tur puan a ni thung.

Senior BJP leader leh Union Minister JP Nadda chuan hmarchhak candidate puan chhuahna hi a nei a ni.