Assam-ah undergraduate MP pali awm : ADP Report

Inthlan endiktu pawl, Association for Democratic Reforms (ADR) chuan report an tihchhuahah Assam MP pali chu undergraduate an nih thu an tarlang.

Heng MP pali zinga pahnih hi chu BJP MP an ni a, pakhat hi All India United Democratic Front (AIUDF) niin pakhat dang leh hi Independent a ni thung.

Tunah hian MP ni tura qualification-ah a hniam berah graduate tal an ni tur tia petition thehluh a awm a, Supreme Court chuan hearing a nei dawn nia tarlan a ni.

ADR report chuan BJP Dibrugarh MP Rameshwar Teli chu matriculation thleng zir a nih thu leh 1989 khan class 10 Board exam a pass chiah thu tarlangin, MP zawng zawng zinga zir hniam ber a nih thu an tarlang.

Ani bakah hian BJP MP Pradan Baruah chu Pawl 12 pass a nih thu an tarlang bawk. BJP hian an candidate tur list la tarlang lo mah se Baruah leh Teli-te chu ding leh tur zingah an hming tarlan a ni tawh.

ULFA hel member ni ṭhin, Kok­rajhar-a Independent MP Naba Kumar Sarania pawh Pawl 12 thleng zir niin a ni pawh hi Kokrajhar-ah hian a din leh ngei rin a ni bawk.

AIUDF Kamrimganj MP, Radhe­shyam Biswas pawh Pawl 12 thleng zir a nih thu tarlangin, ani pawh hi inthlanah hian a din leh ngei rin a ni.

Assam MP dang zawng erawh graduate an nih mai piah lamah post-graduate-te an ni nawk hlawm thung. AIUDF MP (Barpeta) Siraj Uddin Ajmal, BJP MP Ramen Deka (Mangoldoi), Rajen Gohain (Nagaon) leh RP Sarmah (Tezpur)-te chu graduate an nih thu ADP report chuan a tarlang. Hetihlai hian AIUD Badruddin Ajmal (Dhubri), BJP Kamakhya Prasad Tasa (Jorhat) leh Bijoya Chakraborty (Guwahati), Congress Biren Singh Engti (Autonomous District), Gaurav Gogoi (Kaliabor) leh Sushmita Dev (Silchar)-te chu post-graduate an ni.

SC hnena MP-te graduate tal an ni tur a ni tia petition thehluh awm chu March 25 hian ngaihtuah tura dah a ni.