Manipur-in Class 10 leh 12 board exam hun sawn
Manipur sorkar chuan an state-ah Covid-19 hri a darh leh tak avangin Class 10 leh 12 board examination neih hun sawnhlat a nih thu Thawhṭanni khan a puang.
Central Board of Secondary Education (CBSE) leh state eng emaw zat chuan hri leng thawh hnihna thleng mek avangin board exam neih turte chu an lo sawn hla tawh hlawm a ni.
Thawhṭanni khan commissioner (education-S) T Ranjit Singh chuan thupek hi tichhukain, hri leng thar leh mek chu mipui nawlpui, zirlai nu leh pate bakah an guardian-te thlengin hlauthawnna nasa tak an neih avangin, High School Leaving Certificate Examination (HSLC) leh Higher Secondary Examination (HSLC), 2021, May 6-June 5 inkara neih tur chu sawn hlat a nih thu a sawi.
State sorkar chuan zirlai tinte himna turin sorkar school leh private school-a Class 9 -12 ten school kaltir pawh thupek awm leh hma chu titawp a, physical class nei chhunzawm tawh rih lo turin a ti bawk. Heng class-te tan hian a hma thei ang bera online class neihpui turin a ti a ni.
Chief secretary-in Covid-19 hri a kai
Manipur chief secretary Rajesh Kumar chu Thawhṭanni khan Covid-19 hri a kai tih hriat a ni.
Rajesh Kumar hi a hriselna ṭhat tawk loh avangin Imphal-a Jawaharlal Nehru Institute of Medical Sciences (JNIMS) Hospital-ah enkawl a ni a, mahse hri a kai tih hriat a nih hnuah Regional Institute of Medical Sciences (RIMS) Hospital-ah sawn a ni.
Hri leng thawhhnihna thlen hnuah state official dang pahnih pawhin Covid-19 an kai tih hmuh chhuah a ni tawh bawk a, hri kaite hi additional secretary (tribal affairs and hills) Letkhogin Haokip leh Manipur CEO PK Singh-te niin, ngaihtuahawm erawh an ni lo.