TTAADC CEM atan Purna Jamata rawt

Tripura Tribal Areas Autonomous District Council (TTAADC) member tharte chuan chief executive member (CEM) atan Tipraha Indigenous Progressive Regional Alliance (TIPRA) member Purna Chandra Jamatia an rawt.

TTAADC CEM atan hian TIPRA chairman Pradyot Kishore Deb Barman ruat a ni dawn nia thuthang a awm hnuah, Barman zawk hian Chandra Jamatia hi an party-in an ruat thu leh, hei hi member-te pawhin an pawm vek thu a sawi.

Deb Barman chuan Purna chu mi rinawm, mi thiam, la ṭhalai leh viak ṭha tak a nih thu sawiin, hmingchhiatna nei lo niin council pawh ṭha taka a hruai theih tur thu a sawi a, mi taima leh thawk rim tak a ni tih a sawi bawk.

Purna Chandra Jamatia hi Killa-Bagma bial aṭanga thlan tlin niin, TIPRA a zawm hma hian tuna TIPRA thawhpui, Indigenous People’s Front of Tripura (IPFT)-ah a awm ṭhin.

Barman chuan an party chuan 'one post system' an kalpui tih sawiin, mi pakhatin hotu nihna chanvo pakhat aia tam a chelh dawn lo tih a sawi. Hei vang hian CEM atan pawh Chandra Jamatia ruat an nih thu a sawi a ni.