Shillong-ah ni 14 chhung school khar : State pawn aṭanga khualzin luh khap dawn

Covid-19 hri leng thar leh avangin Meghalaya sorkar chuan state khawpui, Shillong leh a chhehvel biala zirna in zawng zawng chu nimin, Thawhlehni aṭang khan ni 14 chhung, May 4 thleng atan a khar tir.

Thawhṭanni chief minister Conrad K Sangma hoa review meeting neihah hri leng vanga school khar rih hi an rel a ni. Ni thum liam ta chhung khan East Khasi Hills district bikah hian Covid-19 hri kai thar mi 479 an awm a ni.

CM chuan school-te hi khar ni mah se, HSSCL leh SSLC exam erawh ruahman lawk angin kalpui a ni dawn tih a sawi.

Meghalaya sorkar chuan April 23 aṭangin state pawn lam aṭanga khualzin luh an khap dawn tih a sawi bawk. State chhunga tourist spot hrang hrangte pawh khar an ni ang. Hemi rual hian state chhunga inzinpawh erawh khap a ni lo tih a sawi bawk.

Sangma chuan nikuma hri leng thawh khatnaah khan ni 114 chhungin hri kai, active case 665 an awm hman a, mahse tun ṭuma hri leng thawhhnihna an tawrh mekah ni 25 chhung lekin active case 665 an tling hman a ni, a ti. Nikum nena chhutin hri kai zat hi a let thum zetin a pung chak a, hei vang hian hri darh zel tur venna atana theihtawp chhuah turin mipui leh department hrang hrangte ngen an nih thu a a sawi bawk.