Citizenship Amendment Bill hi Constitution kalh a ni: Tarun Gogoi

Assam Chief Minister ṭum thum lai ni tawh leh hmarchhaka Congress hruaitu langsar ber zinga mi, Tarun Gogoi chuan The New Indian Express in an kawmnaah, Citizenship Amendment Bill chu India ram Constitution kalh a nih thu a sawi. Tarun Gogoi hi kum 84 lai ni tawh mah se Assam Congress tan nasa takin hma a la reng a, Congress hruaitu rinrawl ber zinga mi a la ni reng bawk.

Kum 2001-a Assam-a Congress in hnehna an chan chhan bul bera ngaih ni bawkin, 2001 aṭanga 2016 chhung khan Assam Chief Minister a ni a, a zawnin term thum ngawt CM dinhmun hi a chelh a ni.

Citizenship (Amendment) Bill, 2016 chungchanga a ngaihdan
Tarun Gogoi chuan India chu ṭawng, culture leh tradition hmanga din niin sakhuana behchhana din a ni lo tih a sawi. Chumi a nih avang chuan eng sakhua emaw behchhanin Bill siam theih a ni lo tih sawiin hemi avang hian Constitution innghahna kalh a ni tih a sawi a ni. Eng vang pawh nise, Citizenship Bill hi engnge kan mamawhna? tia zawhna siamin, Bangladesh leh Pakistan-ah muslim ni lo sawisakna complaint lian a awm lo tih a sawi bawk.

Vawiin thleng pawhin Bang­ladesh-ah Hindu mi cheng vaibelchhe hnih aia atam an awm tawh sawiin, tihduhdahna emaw sakhaw kaihhnawiha harsatna an tawh complaint a awm lo tih a sawi. Khawvel hmundangah hetiang dan hi a awm ngai lo tih sawiin, sakhaw zalenna ram ni lo Pakistan-ah pawh Muslim te duhdan bik humhimna dan a awm lo tih a sawi a ni.

AGP leh BJP thawhdunna leh chungchanga AGP hmalam hun a hmuhdan
Kum 83 mi, Congress hruaitu chuan Asom Gana Parishad (AGP) chu BJP an tlin leh chuan CAB an pulut leh ngei dawn tih hrereng chunga thawhpuiah a puh. Hemi avang hian an party hmalam hun chu a ṭha lo tih sawiin, AGP chuan Assam an phatsan a ni, a ti.

Thawhdun leh an duh chhan pawh thuneih an chak vang tih sawiin, Assam mipuite chuan AGP chu an ngaidam dawn lo tih a sawi.

AGP-BJP ṭangkawp chuan Congress tan harsatna an thlen ang em?
Gogoi chuan AGP-BJP ṭang­kawp chu an tan buai phahna tur a awm lo tih sawiin, a nihna takah chuan min ṭanpui zawk dawn a ni, a ti. Mipuite chuan CAB an dodal tih an hriat thu sawiin, Congress chu hemi kawngah hian an inpe hle tih an hria tih a sawi.

Heng avang hian duhthlanna an neihchhun chu Congress-ah a ni tih sawiin, mipuite chuan an vote ngei pawh a ring tih a sawi. "Ka hmuh dan chuan, AGP-BJP ṭangrual chu Congress tan chuan malsawmna a ni," a ti.

Congress in AIUDF an thawhpui dawn em?
"Congress chuan duh loh chung inneih luihna an thlawp thei lo. Mimal tak chuan inhmangaih avanga inneihna hi duh lo chunga inneih luihna ai chuan ka pawm zawk. Party pahnih thawhdunna tur chu ka remti ngai lo ang" tiin a chhang.

BJP in an hlawhchhamna hliahkhuh an tum!
PM leh BJP-te hian Pulwama attack leh a hnua thil thlengte chu an politicise in i hria em tia an zawhna chu chhangin Gogoi chuan BJP chuan an hlawhchhamna hliahkhuh an tum tih a sawi. "Indian Air Force chuan hna ṭha tak an thawk a, mi zawng zawngin kan chhuang a ni," tia sawiin, armed force-te chu ram pum ta an ni a, political party pakhat ta bik an ni lo tih a sawi. BJP chuan an thutiam an tihhlawhtlin loh avangin, voter-te hneh nan force lam an hlan tih a sawi a ni.

Kan ram economy a chhe hle tih sawi bawkin, sector zawng zawng chu an hnufual hle tih a sawi. Thil nihna diktak hmuhtir aiin Prime Minister chuan armed force-te inpekna chu remchangah hmangin politics lama hlawkpuin atan lo neih a tum tih a sawi.

Modi-an hmarchhak tan a thutiam a tihhlawhtling lo
Assam CM term thum lai ni tawh Tarun Gogoi chuan Prime Mi­nister Narendra Modi chu hmar­chhak tana a thutiam-te ti hlawh­chhamah a puh. May 16, 2014 hnua ramchhunga dan loa lo lutte hnawhchhuah a tiam pawh a tihhlawhtling lo tih a sawi. Thu­neihna an chan hnuah chuan engmah a ti lo tih a sawi bawk.

NDA chuan dan loa a ruka Assam-a lut tihtawpnan engmah an ti lo tih sawiin, tunah chuan BJP chuan an thutiam, dan loa ramchhunga lut chungchang emaw, Assam community paruk hnenah ST status pek chungchang emaw te chu an sawilang tawh ngai lo tih a sawi.