Tripura: Mi 1350 in BJP an zawm : Door-to-door campaign kick off nei

Tunhnaiah hmarchhakah chanchin duhawm loh tak tak nei zeuh zeuh mah se Tripura BJP tan chuan thu lawmawm tak a ni ngei ang.

Tripura Chief Minister Biplab Kumar Deb chuan Pathianni khan Left party leh Congress party aṭangin mi 1350 in an party an zawm thu Sonamura-a vantlang inkhawma thu a sawinaah a sawi.

Biplab Kumar Deb hian a Twitter-ah pawh an party chu mi tam takin an zawm thu sawiin, Tripura mipuite-ah Sabka Saath Sabka Vikas ringtu mi tam tak an awm tih a tilang tih a sawi bawk.

Kamalasagar-a thu a sawinaah pawh Kumar Deb chuan Tripura leh ramchhung hmun hrang hranga mipuiten Prime Minister Narendra Modi an thlawpna chuan inthlan awm turah BJP chu hnehna a chantir ngei dawn tih a tilang chiang hle tih a sawi a ni.

Kamalasagar-ah hian CPI-M thlawptu mi 230 in BJP an zawm tih a sawi bawk.

BJP hian Pathianni khan door-to-door campaign kick off neiin, Lok Sabha inthlan atana campaign ngawrh lehzual zawka kalpui an tum.

West Tripura seat-a BJP candidate Pratima Bhowmik chuan Pathianni khan Lake Chowmuhani area-ah door-to-door campaign hi a ṭan nghal a ni.

BJP hian rampum huap ang chuan ‘Ghar-Ghar Chalo Abhiyaan’ (door-to-door campaign) hi an kalpui tawh a, Lok Sabha inthlan awm tura atan in hrang hrangah lutkualin Prime Minister Narendra Modi kaihhruai BJP sorkar hmalakna hrang hrangte an sawi ṭhin a ni.

BJP candidate Pratima Bhowmik hian “Namo Again” tih slogan hmangin campaign hi a nei ṭan a, mipuite nena inkawmna hun te an hmang bawk.

Tripura-ah hian Lok Sabha inthlan hi thawh­hnihin an nei dawn a, April 11-ah thawhkhatna an nei ang a, April 18-ah a thawhhnihna an nei thung ang. May 23 hian ramchhung hmundang rualin vote chhiar a ni ang.