Bhaichung-an a jersey pahnih lilam

India football captain hlui Bhaichung Bhutia chuan an party Hamro Sikkim Party (HSP) in inthlan awm tura an sum mamawh hmuhchhuahna atan Pathianni khan a jersey ngaihhlut tak pahnih a lilam.

United Nations De­velopment Programme in an buatsaih 'Match Against Poverty'-a a hak jersey leh Bayern Munich nen 2012-a farewell match an khelh ṭuma a hak te a lilam a ni.

Heng jersey a lilamah te hian France footballer lar Zinedine Zidane leh Partuguese footballer Figo-te signature pawh a chuang nghe nghe.

Bhaichung Bhutia kaihhruai HSP hi nikum March 31-a din kha niin an party manifesto-ah chuan 'Happy Sikkim' kalpui an tum thu an tarlang a, Bhaichung chuan ṭhalaite tana programme, politics tel lo an duan thu sawiin, Sikkimese ṭhalaite chuan nun zalen leh dik tak hmang se an duh thu a sawi a ni.

Sikkim-ah hian assembly constituency 32 awmin Lok Sabha seat pakhat an nei a, April 11 hian LS inthlan leh assembly inthlan hi an nei rual dawn a, May 23-ah result puan a ni ang.