Tripura-ah Congress leh INPT thawkdun dawn

Tripura-ah chuan Lok Sabha inthlan atan Tripura Pradesh Congress Committee (TPCC) leh Indigenous Nationalist Party of Twipra (INPT)-te chuan thawhdunna tur thuthlung an ziak. Hei hi Tripura politics history-ah chuan thil chhinchhiah tlak tak a nih rin a ni.

TPCC chuan Royal scion Pradyot Bikram Manikya Debbarma kaihhruaina hnuaiah INPT chu Lok Sabha inthlan atana thawhpuina tur Memorandum of Under­standing an ziahpui.

Tunthla tir lam khan INPT hruaitu lu leh hel ni ṭhin, politician ni ta Bijoy Kumar Hrangkhawl chuan Congress nen thawkdun tura inbiakna an neih thu leh Congress chuan thil pawm harsa tak hmanga inremna siampui an tum avangin inremna an siam theih loh tur thu a lo sawi tawh a ni.

TPCC President Pradyot Manikya chuan social media-ah INPT nena an thawkdun tur chu lawmawm a tih thu sawiin, AICC leh INPT chuan MoU pawh an ziah tawh thu a sawi. Congress chuan thuneihna an chang a nih ngat chuan CAB chu an tihbo dawn thu leh, Forest Bill an tihnun leh dawn thu a sawi bawk. ADC area-a Direct Funding-te, TNV/ATTF accord kalpui leh te chu an hmalakna tur a nih thu a sawi a ni.

Pradyot Manikya chuan BK Hrangkhawl leh Jagadish Debbarma-te chuan anmahni thlawp an tum tih a sawi a, INPT-te nena mimal tak pawha inkungkaihna ṭha tak an nei thei chu a lawm thu a sawi a ni.

Hetihlai hian sorkarna siama thawkdun mek BJP leh IPFT chuan candidate a hran ve vea siam an tum thung.