Manipur sorkarin Covid SOP siam thar dawn Testing kit an ngah tawk tih a sawi

Manipur sorkar chuan an state-a Covid-19 darh zel tur venna atan test tam zawk  neih chhoh a tum a, RT-PCR, TrueNat leh Rapid Antigen Test (RAT) neihna turin testing kit  pawh a chhek khawl ngah tawk tih a sawi. 

State chhungah Covid-19 testing kit a tlem nia thuthang a awm hnuah, additional health director Dr K Sasheekumar Mangang chuan chhangin, testing kit-te chu a tam tawk hle tih a sawi. 

Manipur-ah hian sample 3,47,026 test a ni tawh a, entry point hrang hrangah state chhunga lut tur mi 4,26,307 screening neih a ni tawh bawk. 

Chief minister N Biren Singh chuan an state-ah hri kai an pun chak chhoh leh tak avangin sorkarin inkaihhruaina, Standard Operating Procedures (SOPs) thar a siam leh dawn tih a sawi. Hemi rual hian CM chuan hri darh tur venna atana sorkarin kaihhruaina a siamte chu zawm ṭha turin mipuite a ngen. 

CM chuan hri leng dona kawngah mitinte ṭan an lak a ngai tih a sawi a, hri dona kawnga a hmatawng, frontline worker-te chu kum 2021 thleng atan life insurance scheme siamsak a ni tih a sawi bawk. 

Covid-19 kaite enkawlna chu Ayushman Bharat scheme in a huam thei tawh a, Manipur sorkar pawhin  state govern-ment health scheme-in a huam tel theih turin pawm thuai a tum bawk. 

Manipur sorkarin Covid-19 dona atana a sum sen chu cheng vaibelchhe 62 vel a tling tawh thi CM chuan a sawi a, heng zing Rs vbc 26.68 chu quarantine centre-ah hman niin, medical equipment atan Rs vbc 3.39 leh Covid testing kit leh machine leina atan Rs vbc 2.59 a hmang tawh bawk. Covid Care centre-ah Rs vbc 5.33 sengin, ambulance lei leh enkawlna atan Rs vbc 2.53; police, transport leh Manipur Bhavan tan Rs vbc 3.46 leh inhlawhfate chhawmdawlna pekna atan Rs vbc 18 sen a ni tawh tih CM chuan a sawi. 

Imphal-a RIMS leh JNIMS hospital-ah khum 40 ve ve dah belh a ni dawn a, Shija Hospital-ah khum 50 dah belh ni tawhin, thla khat chhungin khum 36 dah belh leh tum a ni bawk.