Vawiin aṭangin Assam-ah school hawng dawn

Assam sorkar chuan hripui leng vanga thla riat dawn school khar a nih hnuah, vawiin aṭangin state chhunga zirna in hrang hrangte a hawng ṭan tawh dawn. 

Sorkar chuan school thuneitute chu hri laka naupangte himna turin sorkarin kaihhruaina a siamte khauh taka zawm turin a chah. School hawn a nih hma hian school tina teaching leh non-teaching staff-te chu Rapid Antigen Test (RAT) nei vek tura tih an ni bawk. 

Zirna in te hi hawn ṭan ni mah se, a rualin an la kal vek dawn lo. Class 6,8, 10 leh 12 zirlaite chu Thawhṭanni, Nilaini leh Zirtawpniah an kal ang a, Class 7, 9 leh 11 zirlai­te chu Thawhlehni, Ningani leh Inrinniah an kal thung ang. 

Kartawp apiangin school campus chu damdawi hmanga kah thiang­hlim vek tura tih a ni a, zirlai leh zirtirtute chu nitin school luh dawnah thermo scanner hmanga endik ziah a ni bawk ang. School hawn hi mah se, attendance chu compulsory a ni lo a, school kal turte pawh an nu leh pate remtihna an neih a ngai bawk a ni.