Assam-ah PM Modi campaign dawn Star campaigner dang pawh thehchhuak

Assam BJP hruaitute chuan March 30 hian an state-ah Prime Minister Narendra Modi a campaign dawn tih an sawi.

Bharatiya Janata Party chuan Prime Minister chu Dibrugarh Lok Sabha constituency-a Moran-ah leh Tezpur constituency-a Godhpur-ah thu a sawi dawn tih a tarlang.

Dibruharh-a BJP MP ni lai Rameswar Teli chu a ding nawn leh dawn a, Tezpur constituency-ah erawh state Labour Minister Pallab Lochan Das chu a ding dawn thung a, MP Ram Prasad Sarmah a thlak dawn a ni. Hemi avang hian Ram Prasad hi a lungawi lo hle a, party chhuahsanin party thar din a tum hial bawk.

Dibrugarh hi thingpui huan siamtute awmna hmun a ni a, Tezpur Constiuency-ah pawh hian thingpui hmanga sum­dawngte hi vote hi a hlu hle tho tura ngaih a ni. Teli leh Das-te dinna bialah hian thingpui hmanga sumdawngte vote a hlu hle dawn tihna a ni.

Hetihlai hian eptu lam Congress chuan Assam-a cam­paign tur hian party General Secretary Priyanka Gandhi chu chah luh an tum ve mek bawk nia sawi a awm a, thuchiang erawh an la nei lo thung.

Hetih lai hian Thawhṭanni aṭang khan BJP Assam in-charge Mahendra Singh chuan Silchar-ah campaign a nei ṭan tawh bawk a, state chhunga party hruaitu lar NEDA convenor Himanta Biswa Sarma chu Tezpur-ah campaign in Chief Minister Sarba­nanda Sonowal pawh Lakhimpur constituency-ah a campaign bawk.

Anni bakah hian nimin khan Union minister Babul Supriyo chuan Karimganj constituency-ah party meeting a kaihhruai rin a ni a, he thu ziah lai hian thuchiang erawh hriat hman a la ni lo.

West Bengal-a party hruaitu hlun Rupa Gan­guly leh State BJP pre­sident Ranjeet Kumar Dass-te pawh Nagaon con­stituency-ah an campaign dawn bawk a ni.

Union Minister Kiren Rijiju pawhin Lakhimpur constituency-ah campaign kalpui a tum bawk.

Assam Lok Sabha consti­tuency 14-ah hian inthlanna hi thawh thuma neih tur niin April 11, April 18 leh April 23-ah vote thlak a ni ang.