Meghalaya-in East Khasi Hills-ah khuahkhirhna siam thar a ni

Meghalaya sorkar chuan state khawpui, Shillong leh a chhehvelah Covid-19 hri kai an pun belh zel avangin East Khasi Hills bik tan Nilaini khan khuahkhirhna a siam thar.

Vawiin aṭanga April 30 thleng huamin East Khasi Hills entry point kaltlang turte chuan RT-PCR test an tih vek a ngai dawn a ni. Shillong khawpuia college leh university-te chu May 3 thleng khar tura tih a ni bawk a, eichawp dawr tel loin dawr dang chu April 26 - May 2 thleng khar vek a ni bawk ang.

State sorkar chuan April thla chhung chu sorkar office leh private office-ah thawktu 33% chin chauh kal turin a ti a, gym, swmming pool, gaming parlour, cinema, club, salon leh bar-te pawh tun thla chhung khar tura tih a ni.

Deputy chief minister Prestone Tynsong chuan an state tlawh rih lo tura ngenna siamin, state mipuite pawh fimkhur a, pawn chhuak tam lo tur leh Shillong-a zin rih lo turin a ngen bawk.

Tynsong chuan mipuiten thu an zawm ṭhat lo a, hri a la darh zel a nih chuan total lockdown a puan leh mai a ngai dawn tih sawiin, mipuite chu sorkar hmalakna thlawp ṭha turin a ngen.