Manipur MLA atan Y Erabot Singh la lut

Manipur High Court-in kum 2017 assembly inthlana Wangkhei bial MLA atana thlan tlin, Okram Henry thlan tlin a nihna pawm loa a hnawl hnuah, he inthlan ṭuma vote hmu tam ber dawttu, BJP candidate Yumkham Erabot Singh chu Nilaini khan MLA atan rinawmna thu tiam tira lakluh a ni.

Justice M V Muralidaran chuan April 15 khan MLA atana Okram Henry thlan tlin a nihna chu hnawlin, Wangkhei bial MLA atan Erabot Singh hi a lo puang tawh a ni. Okram Henry hian kum 2017 inthlanah hian Congress candidate niin thlan tlin a ni a, mahse kum 2019 khan BJP a zawm.

Singh hian High Court-ah petition a thehlut a, 2017 assembly inthlan neih tura Okram Henry-a'n affidavit thehluhah thil dik tawk lo a ziak niin a sawi. Henry hian kum 2012 inthlan dawn leh 2017 inthlan dawna a edutional qualification a ziahlan chu a in ang lo tiin a sawi a ni. Hei hi court hian a ngaihtuah hnuah, MLA atana Henry thlan tlin a nihna hi a hnawlsak ta a ni.

Manipur speaker Yumnam Khemchand Singh chuan MLA thar atan Yumkham Erabot Singh hi a lalut a, lakluh inkhawmah hian chief minister N Biren Singh pawh a tel.