Manipur-a Ima Keithel ni 10 chhung khar

Manipur sorkar chuan Imphal-a mother's market, Ima Keithel chu state chhunga hri leng a zual chhoh leh avangin ni 10 chhung khar turin Nilaini khan thupek a tichhuak.

Chief secretary in-charge leh state executive committee chairman, MH Khan chuan Nilaini khan thupek hi tichhuakin, hri kai an pun zel avangin hri darh tur venna atana khauh zawka hma lak a ṭul thu a sawi. Ima Keithel pathumte leh an bula bazar lailawk siamte chu ni 10 chhung khar an ni dawn a ni, a ti.

Nikuma Covid-19 hripui leng vang khan heng bazar-te hi kum khat dawn khar an ni a, kumin February 15 khan hawn ṭan leh chauh a ni.

State sorkar chuan Imphal khawpui chhunga bazar leh wholesale dawrte chu inhawn chhawk turin a ti bawk. District dangah chuan deputy commissioner leh SP ten an dinhmun azirin khuahkhirhna hi an siam ang, tiin sorkar thuchhuak chuan a tarlang.

Chief minister N Biren Singh chuan state mipuite chu sorkarin hri darh tur venna atana kaihhruaina a siamte zawm ṭha a, sorkar thawhpui turin a ngen. Healthcare worker- doctor, nurse leh parmedical staff zawng zawng chu an post-ah awm vek turin a ti bawk.