Agartala-ah zan curfew puan a ni

Tripura sorkar chuan an state-ah hri leng vangin lockdown leh curfew puan a ni rih lo ang tih sawi mah se, hri kai an pun belh zel avangin state sorkar chuan Agartala Municipal Corporation (AMC) area-ah zan lam curfew a puang thar.

Corona night curfew puan hi nizan aṭang khan hman ṭan nghal niin, zan dar 10 aṭanga a tuk zing dar 5 thleng a huam. Chief minister Biplab Kumar Deb hoa state cabinet meeting neih hnuah, AMC area-a zan curfew puanna thupek hi chief secretary Manoj Kumar chuan a tichhuak a ni.

Covid-19 hri leng hluar zel avangin sorkarin hna lakna tura exam a buatsaih turte pawh sawn hlat vek an ni a, Joint Recruitment Board of Manpower and Employment Department-in written exam a buatsaih tur leh IR battalion physical test neih tur pawh sawn an ni bawk.

Pawn chhuahnaa face mask vuah lo mante chu man vawi khatnaah Rs 200 chawitir an ni a, man nawn an nih chuan Rs 400 zel an chawi ang. Social distancing dan zawm lote pawh Rs 1,000 zel chawitir an ni.

Dimapur-ah zanin aṭangin curfew dawn
Nagaland commercial centre, Dimapur khawpuiah pawh zanin aṭangin zan lam curfew puan a ni dawn.

Dimapur district thuneitute chuan zanin aṭanga ṭanin, zan dar 8 aṭanga a tuk zing dar 5 thleng khawpui chhungah curfew puan a ni tih an sawi a, dawr leh sumdawnna hmun dangte pawh zan dar 7-ah inkhar fel vek tura tih an ni bawk.