AP sorkarin a hnuaia thawk ruihhlo tite dapchhuah tum

Arunachal Pradesh sorkar chuan ruihhlo do beihpui thlaknaah a bul ṭanna atan sorkar hnathawk zinga ruihhlo ti ṭhinte dapchhuah a tum.

Chief minister Pema Khandu chuan sorkar hnathawkte hnenah ruihhlo an tih leh tih loh chu an senoir officer-te hnenah report vek turin a hriattir dawn tih a sawi a, in report lo, ruihhlo tih hriat chhuahte chungah action lak a ni dawn tih a sawi bawk.

February thla khan chief secretary Naresh Kumar chuan ruihhlo hluarna district-a sorkar hnathawkte chu ruihhlo an tih leh tih loh hriatna atan toxicology test neih sak vek an nih tur thu pawh a lo sawi tawh bawk.

India rama ruihhlo hluarna district 272 thlan chhuah zingah Arunachal Pradesh-a Namsai, Lohit, Dibang Valley, Upper Siang, Anjaw, Changlang, Tirap leh West Kameng district-te an tel a, ruihhlo ngai zingah hian sorkar hnathawk tam tak an tel nia sawi a ni.