Assam : LS inthlan thawh khatna atan nomination 45 Thawh hnihna atan 60

Lok Sabha inthlan awm turah hian Assam chuan thawh thumin inthlan hi an nei dawn a, April 11, 18 leh 23-ah te LS inthlan hi an hmachhawn dawn a ni.

Inthlan thawh khatna leh thawh hnihnaa party hrang hrang aiawha ding turte hi an chiang tawh a, thawh khatna, April 11-a neih turah hian nomination mi 45 in thehlutin, thawh hnihnaa ding tur hian mi 60 in nomination an thehlut thung.

A thawh khatna:
Inthlan thawh khatna hi Tez­pur, Kaliabor, Jorhat, Dibrugarh leh Lakhimpur constituency-ah te neih a ni dawn a, Lakhimpur-ah hian mi 12 in nomination an file a, Tezpur-ah 10 in file thungin, Dibrugarh-ah leh Jorjat-ah pariat ve ve in nomination an file a ni. A thawh khatnaa inthlan nei tur zingah hian Kaliabor seat-ah nomination file tlem berin, candi­date pasarih an awm dawn a ni.

Heng zingah hian Gaurav Gogoi (Congress) leh Mani Madhab Mahanta (Asom Gana Parishad), bureaucrat hlui M.G.V.K. Bhanu (Congress) leh state Minister Pallab Lochan Das (BJP), state Power Minister Tapan Gogoi (BJP) leh Sushanta Borgohain (Congress), MP hluiPaban Singh Ghatowar (Congress) leh sitting MP Ra­mes­war Teli (BJP), Anil Buragohain (Congress) leh sitting MP Pradan Boruah (BJP)-te chu hming langsar zualte an ni.

A thawh khatnaah hian vote nei mi 75,16,284 an awm.

A thawh hnihna:
Inthlan thawh hnihna hi Ka­rimganj, Silchar, Diphu, Ma­ngaldai leh Nowgong Lok Sabha constituency-ah te neih a ni dawn thung.

Karimganj-ah hian no­mination file mi 19 an awm a, Silchar-ah 14 awmin, Diphu-ah paruk an awm thung a, Mangaldai-ah 13 awm bawkin, Nowgong-ah pariat an awm thung a ni.

Karimnagar constituency hi inthlan ngaihnawmna tur hmun nia ngaih niin, BJP candidate Kripanath Mallah, Congress Swarup Das leh All India United Democratic Front (AIUDF) MP ni mek Radhesham Biswas-te inbei tur hian mipui ngaihven a hlawh hle. Anni bakah independent candidate 11 an la awm cheu bawk.

Silchar-ah hian BJP candidate Rajdeep Roy leh Congress MP ni mek Sushmita Dev-te an inkhing dawn a, hei hian boruak a ti lian viau bawk. Silchar-a ding tur independent candidate pariat-te pawh hi an ṭha hle hlawm niin an sawi bawk.

Diphu (Autonomous District)-ah hian Congress MP ni mek Biren Sing Ingty leh BJP Horen Sing Bey-te an inkhing dawn a, Mangaldai-ah pawh BJP Dilip Saikia leh Congress candidate Bhubaneswar Kalita-te inkhing tur hian boruak a siam hle a ni.

Nowgong-ah chuan BJP aiawhin Rupak Sarma a ding dawn a, Congress chuan Pradyut Bordoloi an thehchhuak dawn thung.

Inthlana nomination lutte hi Thawhlehni khan enfiah niin, vawiin thleng hian inhnuhdawhna hun hawn a ni. May 23-ah result puan a ni ang.