AP: BJP in assembly seat hnih la!

Arunachal Pradesh assembly inthlan hun tur chu April 11 daih la ni mah se Bharatiya Janata Party (BJP) chuan chuhpuitu an awm loh avangin seat pahnih chu an la tawh tih an sawi.

Union Minister, Chowkidar Kiren Rijiju chuan a twitter-ah ,"BJP chuan hnehna hmasa ber an chang ta! Arunachal Pradesh 31-Aalo East Constituency BJP MLA candidate Shri Kento Jini chu chuhpuitu awm loin a tling", tih a tweet a ni.

He thu a tweet hnu lawkah hian Rijiju bawk hian ," BJP in hnehna dang an chang leh ta! BJP MLA candidate Shri Taba Tedir chu chuhpuitu awm loh avangin Arunachal Pradesh 16-Yachuli Assembly Constituency-ah a tling leh a ni", tiin thuchhuah a siam leh.

Arunachal Pradesh-ah hian Assembly seat 60 awmin April 11 hian Lok Sabha inthlan leh assembly inthlan hi an nei rual dawn a, Lok Sabha seat hnih an nei a ni.

LS inthlanah hian Union Minister of State for Home Kiren Rijiju hi Arunachal Pradesh West BJP candidate a ni dawn a, Arunachal East parlia­mentary seat-ah chuan Tapir Gao chu an candidate tur a ni thung.