Nagaland: Aonglendeng Assembly seat by-poll NPP candidate chin hriat lohin bo

Nagaland-a 26 Aonglendeng by-election neih tura National People's Party (NPP) candidate O.Tinujungshi Longkumer chu March 26 aṭang khan chin hriat lohin a bo.

Tinujungshi Longkumer hi nomination a file hnu lawkah a bo zui nia tarlan a ni. Nagaland state unit NPP chuan Nilaini khan Longkumer hi ni hnih chhung a in report tawh loh avangin FIR an thehlut.

NPP national general secre­tary, Vivekraj Wangkhem chuan MLA boralta Imtikumzuk Longkumer unaupa Longkumer hian inthlanah hian hnehna channa chance a nei ṭha hle tih a sawi. NPP tan nomination a file tawh tih sawiin, an beisei loh lutukin a chin an hriat tak loh avangin a bo thu complaint hi an ziak ta tih a sawi bawk.

26 Aonglengden Assembly Constituency by-election hi April 11 hian Lok Sabha inthlan neih ruala neih tur a ni.

NPP hruaitute chuan Long­kumer bo chungchangah hian party dang inrawlh an awm an rin leh rin loh zawhna chu, inrawlh an awm ngei an rin thu in an chhang. Nagaland NPP hian Election Commission of India hnenah pawh Longkumer bo chungchang hi thlen tawhin rang taka chhui zui turin an ngen bawk.

Aonglengden Assembly Constituency MLA Imtikumzuk Longkumer chu September 22, 2018 khan a thih avangin he bialah hian inthlanna hi neih ṭhat a ngaih phah a ni. Imtikumzuk Long­kumer hi Nationalist Demo­cratic Progressive Party legis­lator niin Sericulture leh Excise advisor ṭhin a ni.