Assam-ah khum 500 awmnna COVID care centre siam thar
Assam-ah Covid-19 hri kai an pun belh zel avangin Guwahati-ah hri kaite enkawlna tur khum 500 awmna siam belh mek a ni.
Indira Gandhi Athletic Stadium, Sarusajai Stadium tia hriat larah hian khum 500 awmna tur Covid care centre hi siam niin, khum 350 chu peihfel a ni tawh a, a bak khum 150 pawh siam zawh thuai tum a ni. He centre-ah hian hri kai, symptom nei leh nei lo dahna siam a ni ang.
State sorkar chuan damdawi-in indaih lohna pung zel avangin district tina DC-te hnenah hri kai, dinhmun ngaihtuahawm lote enkawlna turin an district-a educational institute hostel bakah hotel-te hman a nih theih dan tur ngaihtuah a,enfiah turin a lo hriattir tawh a ni.
CM-in all-party meeting ko
Chief minister Sarbananda Sonowal chuan an state-a hri leng mek dinhmun sawiho a, hma lak dan ngaihtuah turin Ningani khan Guwahati-ah all-party meeting a ko.
Meeting-ah hian political party hrang hrang aiawhte an tel a, CM chuan hri dona kawnga mipuite fuih a, zirtir turin party hrang hrang aiawhte chu a ngen a, Covid-19 hripui leng mek an hneh ngei theihna turin lungrual taka an thawhho a ṭul thute a sawi. Hri darh zel tur venna atan 'Test, Trace, Treat' thu ṭha taka kalpui zel a ni dawn tih a sawi bawk.
Health minister-in fimkhur turin chah
Tun hnaia lawka Assam-ah Covid-19 hri a hlauhawm tawh lo a, hmai tuamna hman pawh a ngai tawh lo tia sawitu, Assam health minister Himanta Biswa Sarma chuan hri leng hluar leh mek avangin mipuite fimkhur turin a chah.
Sarma chuan a twitter kaltlangin mipuite chu hri leng laka inveng fimkhur turin a chah a, Dibrugarh Airport-a sample lakah Covid-19 hri chi hran, B.1.617, Indian double mutant (L452R and E484Q) hmuh a nih thu a sawi a ni.
April 6 khan Sarma hian an state-ah Covid-19 hri chu awm tawh lo tluk a ni tih sawiin, face mask hman pawh a ngai tawh lo tih a sawi. Mahse a tweet thar berah a thu lo sawi tawh hi a dik tawk lo tih amah ngeiin rawn tichiang lehin, hri leng laka an state dinhmun ṭhat loh zia a rawn sawi lang leh zawk a ni.