Tripura : Quarantine centre aṭangin hri kai 31 tlan chhuak

West Tripura district-a Arundhuti Nagar-a PRTI Covid Care Centre-a Covid-19 hri kai enkawl lai zinga 31 chu centre aṭangin an tlan chhuak tih police-ten an sawi.

Police-te chuan hri kai 31 te hi Nilaini zan khan centre aṭangin an tlanchhuak tih an sawi a, an chhui zui mek a ni. Amtalai sub-division police officer Anirban Das chuan police station leh rel station-ahte hriatir a nih thu sawiin, tlan chhuak zinga atam zawk hi state dang mi an nih avangin rel station lamah Railways Police Force (RPF) pawh uluk taka lo dap tura an hrilh thu a sawi.

Das chuan centre luhna gate-ah hian venhimna ṭha taka siam a ni a, mahse building hnung lam bangah lawn liamin mi 31-te hi an tlanchhuak tih a sawi bawk.

Arundhuti Nagar-a PRTI centre-ah hian Covid-19 hri kai 56 enkawl mek an ni.