Meghalaya MLA-ten Covid-19 test-na tam zawk dah duh

Meghalaya MLA-te chuan an state-a hri lengin zual lam a pan zel avangin state aṭanga lutte uluk taka enfiah an nih theih nan, border-ah Covid-19 test-na tam zawk dah a duh.

Ningani khan chief minister Conrad K Sangma chuan state chhunga hri leng dona kawnga hma lak dan tur ngaihtuahin all-party meeting a ko a ni.

Deputy chief minister Prestone Tynsong chuan MLA-te chuan sorkarin hri pui dona kawnga a hmalakna chu theihtawpa thlawp zel an tum thu sawiin, sorkar pawhin MLA tinte chu an bial chhunga hri dona kawnga hmalaknaah mawhphurhna la tur leh, vaccine la thei chinte chu a rang thei anga la zel tura ngen turin a chah a ni, a ti.

Meeting-ah hian Covid-19 management committee pawh kalpui thar leh an rel a ni. He committee hi nikuma India rama Covid-19 hri a len tirh khan din a ni a, mahse hri lengin ziaawm lam a pan hnu khan an titawp a ni. Covid-19 management committee hian an state dinhmun thlirin nitin review meeting an nei ṭhin dawn a, hmalak ṭulna nia an ngaihte chu sorkar hnenah an hriattir ṭhin ang.