Manipur-a varsity hostel-te khar dawn

Manipur University chuan state chhunga Covid-19 hri leng thar leh avangin university hostel-te chu khar a ni dawn tih a sawi.

Department hrang hrang hotute leh centre director-ten meeting an neihah hostel khar vek hi an rel a ni. University registrar Professor W Chandbabu Singh chuan hostel-a awm mekte pawh a rang thei anga hostel chhuahsan tura tih an nih thu a sawi bawk.

Manipur University hian hri leng vangin BA, BSc, BCom, BSW leh BTT 1st leh 3rd semester exam, April 28-a neih tur chu a lo sawn hla tawh bawk. Manipur Board of Secondary Education chuan Class 10 leh 12 board exam neih tur pawh a sawn hla bawk a ni.